اطلاعات روز: نورستان کې ځایي سرچینې وایي، چې د دغه ولایت په منډول ولسوالۍ کې د تیر حکومت د یو قومندان له وژل کیدو وروسته ځایي خلکو د اعتراض په ډول د منډول د ولسوالۍ له مقام څخه د طالبانو ولسوال شړلی دی.
یو سرچینې چې نه یې غوښتل نوم یې خپور شي، نن (پنج شنبه، ۷ د تلې) اطلاعات روز ورځپاڼې ته وویل، چې دمنډول ولسوالۍ سلګونه اوسیدونکو د دغه ولسوالۍ له مقام څخه د طالبانو ولسوال د اعتراض په ډول په دې خاطر شړلی، چې تیره ورځ ناوخته د بهرام الدین په نامه د تیر حکومت یو قومندان ناپيژانده وسله والو وژلی و.
دوی طالب چارواکي د یاد قومندان د قاتلینو د نیول کیدو په برخه کې پر بې پروایي تورنوي او وایي، ترڅو یې چې د وژل شوي قومندان قاتلین نه وي نیول شوي ولسوال ته به اجازه ورنه کړي چې خپلې چارې له دې ځایه پر مخ یوسي.
یوې بلې سرچینې هم د نوم نه ښودلو په شرط اطلاعات روز ورځپاڼې ته یاده پېښه تایید کړه او ویې ویل، چې د منډول ولسوالۍ مقام د وژل شوي قومندان په کور کې و، نو ځکه خلکو د اعتراض په ډول د طالبانو ولسوال د ولسوالۍ له مقام شړلی دی.
هڅه مو وکړه په دې اړه نورستان کې د طالب چارواکو نظر هم ولرو، له هڅو سره سره یې د ځواب په اخیستو بریالي نشو.
د یادونې وړ ده چې منډول د نورستان یو له هغه ولسوالیو څخه ده چې پنجشیر ولایت سره نږدې پرته ده.
