اطلاعات روز: د پنجشېر ولایت یو شمېر اوسېدونکي وايي، چې له څه مودې راهیسې په دغه ولایت کې مخابراتي خدمات ګډوډ شوي او د شپې له خوا د مبایل انتنونه کار نه کوي.
دوی وايي، په دې اړه يې د مخابراتو له رياست او د «اترا» له ادارې سره خبرې کړي، خو دغو ادارو ورته ویلي چې انتنونه د طالبانو په ولکه کې دي او دغه ډله تخنيکي ټيم ته د لاسرسي اجازه نه ورکوي.
په ورته وخت کې سرچینې وايي، طالبانو د مخابراتي انتنونو په ټاورونو کې قرارګاوې جوړې کړي او د دغو پایو ساتونکي یې رخصت کړي. خو د سرچينې په وينا، طالبان د خپلې خوښې سره سم د مبايل انتنونه بندوي او فعالوي.
سرچينه زياتوي، چې د ورځې په اوږدو کې يو شمېر ګرځنده انتنونه د لمريزې برېښنا په وسيله فعال وي، خو د شپې له خوا د برېښنا د کمښت او جنراتورونو د غير فعالېدو له امله انتنونه بند وي.
د سرچينې د معلوماتو له مخې، له تېرې يوې اونۍ راهيسې د پنجشېر ولايت په مرکز کې د سلام مخابراتي شرکت د یوې پایې فعالیت د لمر لویدو وروسته بندیږي او دغه ډول د دغه ولايت په مرکز حصه اول، دره او ابشار ولسوالیو هم انتنونه قطع کېږي. ویل کېږي چې انتنونه یو له بل سره لینک لري.
پنجشير کې سيمه ييزو طالبانو تراوسه په دې اړه څه نه دي ويلي.
په دې وروستیو اونیو کې دغه ولایت د «مقاومت جبهې» او طالبانو ترمنځ د سختو جګړو شاهد دی.
