اطلاعات روز: کونړ کې د طالبانو د کرنې ریاست مسوولین وایي، په دغه ولایت کې د پنځه نیم میلیونه افغانیو په لګښت د څلورو زراغتي کانالونو د پاکولو او ترمیم چارې پېل شوې.
کونړ کې د طالبانو د کرنې رییس عزت الله هدایت نن (سې شنبه، ۲۹ د وږي) اطلاعات روز ورځپاڼې ته وویل، د دغه ولایت په شیګل ولسوالۍ کې د پنځه نیم میلیون افغانيو په لګښت د څلورو زراعتي کانالونو د پاکولو او ترمیم چارې پېل شوې.
هغه وايي چې د یادو کانالونو لګښت د ملګرو ملتونو د پراختيايي ادارې یا UNDP له خوا ورکول کېږي او د دې ترڅنګ په دې پروژه کې ۷۵۰ کسانو ته د کار زمینه برابره شوې او په نهو میاشتو کې به بشپړه شي.
هدایت زیاته کړه: «د کونړ په شیګل ولسوالۍ په مختلفو سیمو کې د ملګرو ملتونو د پراختیایي ادارې په مالي همکارۍ د ۵ اعشاریه ۵ میلیون افغاینو په لګښت د څلورنیم کیلومتره په اندازه د څلورو زراعتي کانالونو د ترمیم او پاکونې چارې پیل شوې دي.»
نوموړی وایي، د نړۍوالو موسېسو په همکارۍ یې په دغه ولایت کې د زراعت او مالدارۍ د ودې په برخه کې هڅې پیل کړي او تمه ښیي چې د زراعت له اړخه دغه ولایت پر ځان بسیا شي.
د کونړ شیګل ولسوالۍ یوه اوسیدونکی اصف خان له اطلاعات روز ورځپاڼې سره په خبرو کې خوښي وښوده، چې په سیمه کې یې له کلونو راهیسې ویجاړ زراعتي کانالونه بیارغول کېږي.
هغه وایي، د سیمي ګڼو بې روزګارو ځوانانو ته په یاده پروژه کې کاري اسانتیاوې هم برابري شوي، چې هر کس ته د ورځې د کار په بدل کې له ۴۰۰ تر ۷۰۰ افغانۍ مزد ورکول کېږي.
کونړ میشتي وایي حکومت دې دا ډول پروژې ډېرې کړي څو له یوې خوا کرنه وده وکړي او له بلې خوا خلکو ته د کار زمینه برابره شي.
