اطلاعات روز: کندهار کې د شيخ زاید روزنتون له بندېدو سره يو ځای ۱۱۰۰ يتيم ماشومان له خپلو زده کړو بې برخې شوي دي.
کندهار کې د شيخ زاید روزنتون د يوې عربي موسېسې له لوري تمويلېږي چې یتیم ماشومانو ته یې د زده کړو اسانتیا برابره کړې ده.
په دغه روزنتون کې ۹۹ سلنه یتیم ماشومانو ته د زده کړو او ساتنې زمینه برابره شوې وه، چې د خوراک څښاک ترڅنګ ورته د ترانسپورټ امکانات هم برابر شوي وو.
د شيخ زاید روزنتون يو تن کارکوونکي چې نه یې غوښتل نوم يې خپور شي اطلاعات روز ته وويل، اوس مهال دغه روزنتون د بودیجې د کمښت له کبله تړل شوی او پر مهال يې ۱۱۰۰ يتيم ماشومان له خپلو زدهکړو بې برخې شوي دي.
د دغه روزنتون کارکوونکی وايي، د دې مرکز له بندېدو سره يو ځای د دغه روزنتون ۹۷ تنه اداري پرسونل هم بېکاره شوی چې له هغې جملې ۴۵ تنه ښوونکي دي.
د ده په خبره، کله چې ياد روزنتون فعال و نو د لسو ولايتونو يتيمان په همدغه ځای کې زدهکړې کولې او د ۲۰۰ يتيم ماشومان لپاره پکې د ليلې امکانات هم برابر وو.
هغه زياته کړه، چې په ياد روزنتون کې له لومړي څخه بيا تر دولسم ټولګي پورې بې پلاره ماشومانو ته زدهکړې ورکول کېدې.
هغه د ياد روزنتون د بندېدو اصلي لامل د بودیجې نشتون يادوي او وايي، له کله نه چې د طالبانو حکومت واک ته رسېدلی ورته بودیجه نه ده لېږدول شوې.
دغه کس وويل، د شيخ زاهد روزنتون ته هر کال د عربي متحده اماراتو د محمد بن راشد المقتوم له خيريه موسېسې څخه شپږ لکه ډالره بودیجه راتله خو د تېر يوه کال راهيسې ورته دغه پيسې نه دي لېږدول شوي.
د يادونې وړ ده چې کندهار کې د شيخ زاید روزنتون له ۲۰۰۳ کال راهيسې فعاليت درلود چې پر مهال يې ۱۱۰۰ يتيم ماشومانو ته د زده کړې او ساتنې زمينه برابره کړې وه.
