اطلاعات روز: پخواني ولسمشر حامد کرزي په پکتيا کې د نجونو د ښوونځيو د پرانیستلو لپاره د ښځينه زده کوونکو د لاريون ملاتړ کړی او ویلي یې دي، چې د دوى غږ د ټولو نجونو غږ او د افغان ملت غوښتنه ده.
هغه نن یکشنبه (۲۰ د وږي) په یوه اعلامیه کې ویلي: د ښوونځیو د پرانیستلو لپاره د نجونو غږ زموږ د ګران هېواد د عزت، پرمختګ او په خپلو پښو د ودریدو غږ دی.»
کرزي له طالبانو غوښتي چې د نجونو ښوونځي پرانیزي، څو افغانستان له اوسنۍ «محتاجۍ» څخه خلاص شي او د خپلو تعلیم یافته ځوانانو پر مټ د پرمختګ لوړو څوکو ته ورسیږي.
ورته مهال بیا د طالبانو د پوهنې سرپرست وزیر نورالله منیر وايي، چې د نجونو ښوونځي د «کلتوري ستونزو» له امله تړلي او خلک نه غواړي چې اوسنیو شرایطو کې خپلې لوڼې ښوونځیو ته واستوي.
هغه ارزګان ته د خپل سفر پر مهال یوې غونډې ته ویلي، که د خلکو غوښتنې په پام کې ونه نیسي نو خلک به پاڅونونه وکړي.
د طالبانو د پوهنې سرپرست وزیر ویلي، چې هڅه کوي ډېر ژر د نجونو لپاره شرایط برابر کړي، څو وکولای شي په خوندي چاپېریال کې خپلې زدهکړې ترسره کړي.
د طالبانو راتګ سره تر شپږم ټولګي پورته نجونې ښوونځیو ته له ورتګ بندې شوې.
په دې وروستيو کې په پکتيا ولايت کې د دوو اوونيو لپاره د نجونو ښوونځي پرانيستل شول؛ خو بیرته وتړل شول. سلګونه نجونو پرون سهار په ګردېز کې د دې پرېکړې پر ضد لاريون وکړ.
د دغو نجونو لاريون پر خواله رسنیو کې د فعالانو له کلک ملاتړ سره مخ شو.
