اطلاعات روز: کونړ کې طالب چارواکي خبر ورکوي چې نن سهار د کونړ ولایت په یو شمیرسیمو کې د سختې زلزلۍ له امله خلکو ته درانه مالي او ځاني زیانونه اوښتي دي.
د کونړ ولایت لپاره د طالبانو طبیعي پېښو پر وړاندې د مبارزې ریاست د زیانونو ارزونې مدیر احسان الله احسان اطلاعات روز ورځپاڼې ته وویل، چې د نن سهار (دوشنبه، ۱۴ د وږي) زلزلې له کبله د څوکۍ او نورګل ولسوالۍ اړوند« ودیرو، شلط ، ماماګل او اریت» کلیو کې د لومړنیو معلوماتو له مخې ۶ تنو خپل ژوند له لاسه ورکړی او ۹ تنه نور ژوبل شوي دي.
نوموړی وایي، په یادو دوو ولسواليو کې د ځایي خلکو د استوګنې شاوخوا ۵۰ کورونه هم نړیدلي دي.
احسان زیاتوي سیمې ته یې مرستدویه ټیمونه استولي تر څو د زیانمنو شویو خلکو دقیقه سروې ترسره او لاسنیوی یې وکړي.
هغه همداراز وایي، چې د لومړۍ زلزلې د جټکې سره د خلکو هېبتناک غږونه هم مل و، چې له خوبه و او اوس په ځينو سیمو کې د زلزلې تازه جټکې حس کېږي.
ختیځ زون د څلورو ولایتونو سربېره د تېرې شپې د زلزلې ټکانونه د کابل په ګډون د سویل ختیځ زون په یو شمېر ولایتونو کې هم محسوس شوي دي.
د امريکا متحده ايالاتو د ځمکې پيژندنې ادارې د معلوماتو پر اساس د دريښتر په کچه ۵.۳ درجې زلزلې مرکز د افغانستان ختیځ کې د ننګرهار ولایت و.
