اطلاعات روز: د ملګرو ملتونو د ماشومانو د ملاتړ صندوق یا یونیسف نیمروز ولایت کې ۱۷ زره او ۵۰۰ ماشومانو ته د زده کړې ۵۰۰ محلي ټولګي جوړوي.
نيمروز کې د طالبانو د اطلاعات او کلتور ریيس مفتي حبیب الله الهام اطلاعات روز سره په خبرو کې وويل، دغه محلي ټولګي په هغو سيمو کې فعالیږي، چې له تيرو ۲۰ کلونو راهیسې يې ماشومانو زده کړو ته لاس رسی نه درلوده.
هغه وايي، چې د نیمروز ولایت په لېرو پرتو سیمو کې به ۱۷ زره او ۵۰۰ ماشومانو لپاره ۵۰۰ ښوونیز ټولګي جوړ شي چې د ۵۰۰ نارینه او ښځینه ښوونکو له خوا پکې تدريس ترسره کيږي.
مفتي الهام وويل، د نيمروز ولايت په ولسواليو او لېرو پرتو سيمو کې د سيمه ييزو صنفونو د جوړولو پروژه د يونيسف موسېسې له خوا د ۵ سوه زره امريکايي ډالرو په لګښت پلې کېږي.
هغه زیاته کړه، د بې وزلو او لیرې پرتو سیمو د ماشومانو لپاره دغه پروګرام د ډېر وخت لپاره دوام لري.
نمومړي زیاته کړه:«بلې دغه ښوونځي چې د يونيسف موسېسې لخوا جوړيږي د نيمروز ولايت په هغه لېرې پرتو سيمو کې جوړیږي چې ماشومان يې په تيرو شلو کلونو کې له زده کړو بې برخې وو، چې ټوټل ۵ سوه ټولګي به وي او د ۵ سوه نارینه او ښځینه ښوونکو لخوا به دوی ته تدريس وړاندي کيږي دغه پروسه به پر مخ ځي.»
ورته مهال کې د نیمروز ولایت د لېرو پرتو سیمو اوسېدونکي وايي، چې په تېرو شلو کلونو کې د دوی اولادونو ته د زده کړو زمینه نه وه برابره شوې.
دوی وايي، د دغو ښوونیزو ټولګیو په جوړولو سره به د دوی ماشومان د زده کړو له لارې خپل راتلونکی جوړ کړي.
نیمروز د هېواد یو له هغو ولایتونو څخه شمېرل کېږي چې په تېرو کلونو کې په دې ولایت کې زده کړو ته کمه پاملرنه شوې او ډیری ماشومان یې له زده کړو بې برخې پاتې شوي.
