اطلاعات روز: د طالبانو سرپرست حکومت په پام کې لري چې سبا (پنج شنبه، ۲۶ د زمري) په کندهار کې لويې جرګې ته ورته يوه لویه غونډه جوړه کړي.
د کندهار له پاره د طالبانو د اطلاعاتو او فرهنګ ریيس حافظ نور احمد سعيد وايي، دغه غونډه يې د ولسي خلکو په غوښتنه جوړه کړې او د ۲زره په شاوخوا کې خلک به پکې ګډون وکړي.
نوموړی زیاتوي، په دې غونډه کې به د طالب چارواکو تر څنګ تر ډېره پورې پخواني حکومتي چارواکي، دیني عالمان او عام وګړي برخه واخلي.
د حافظ سعيد په وینا، ددې غونډې جوړېدو هدف په افغانستان کې پر روان وضعيت، عمومي او ملي مسايلو بحث کول دي.
په همدې حال کې کندهار کې ځایي سرچینو اطلاعات روز ته وویل، چې د دې غونډې پر مهال به د طالبانو د سرپرست حکومت مشر ملا هبت الله اخندزاده هم وينا وکړي.
د يادونې وړ ده چې په دې وروستيو کې د طالبانو سرپرست حکومت هڅې پيل کړي ترڅو لويې ولسي غونډې جوړې کړي او له همدې لارې د خلکو ملاتړ خپل کړي.
د چارو شنونکي که څه هم د دغه ډول غونډو جوړیدل مهم بولي خو ټينګار کوي چې د طالبانو حکومت بايد د دوحې تړون ته ژمن پاتې شي او له نړيوالو سره پر خپلو کړیو ژمنو کلک ودرېږي.
دا په داسې حال کې ده چې طالبانو څه موده وړاندې هم کابل کې د علماوو په نوم یوه لویه غونډه رابللې وه.
