اطلاعات روز: د احمد مسعود په مشرۍ د «مقاومت جبهه» ادعا کوي چې د دې جبهې غړو د پنجشیر د عناب ولسوالۍ په ارزو دره کې د یو لړ عملیاتو په ترڅ کې د طالب ځواکونو ۴۰ غړي اسیر کړي دي.
د «مقاومت جبهې» ویاند صبغت الله احمدي نن (دوشنبه، ۲۴ د زمري) په خپله فیسبوک پاڼه لیکلي چې د دغې جبهې لخوا څلور طالبان وژل شوي او درې نور ټپیان دي.
پنجشیر کې د طالبانو سیمه ییزو چارواکو تر اوسه په دې اړه څه نه دي ویلي.
څه موده وړاندې د «مقاومت جبهې» په ارزو دره کې د طالبانو یوه چورلکه ویشتلې وه او پکې ناست کسان یې اسیر کړي وو.
دا دره تر دې وړاندې هم څو ځلي د طالبانو او «مقاومت جبهې» ترمنځ د جګړو شاهده وه.
تر دې مخکې په پنجشیر کې ځایي سرچینو خبر ورکړی و، چې په تېرو ۲۴ ساعتونو کې د دغه ولایت دره، آبشار، رُخه او پریان ولسوالیو ځینې سیمې د «مقاومت جبهې» او طالب ځواکونو ترمنځ د نښتو شاهدې وې.
ورته مهال سیمه ییزې سرچینې ادعا کوي، چې د «مقاومت جبهې» د دره ولسوالۍ په جګړه کې وړاندې تګ کړی دی.
د سرچينو د معلوماتو له مخې، د «مقاومت جبهې» ځواکونو د دره ولسوالۍ د «خواجه عبدالله خېلو» له سيمې طالبان په شا تمبولي دي.
سرچینې اطلاعات روز ته وایي، چې د سېلابونو راوتلو له امله په دره ولسوالۍ کې د طالبانو اکمالاتي لار پرې شوې او دغه ډله نه ده توانېدلې، چې نور ځواکونه هلته ولېږدوي.
