اطلاعات روز: ارزګان ولایت کې Move موسېسې د ۳۰ میلیونه افغانیو په ارزښت ۵۶ روغتیایي مرکزونو سره د طبي او غیرې طبي توکو مرسته ترسره کړه.
ارزګان ولايت کې د دغې موسېسې ولايتي مسوول ډاکټر نصير احمد مولوي زاده رسنيو سره په خبرو کې وويل، چې په مرسته شویو توکو کې درمل، غيرې طبي وسايل او په روغتونونو کې د ځينو برخو ترميم شامل دي.
نموړی زیاتوي، چې مرسته شویو توکو سره به د روغتیایي مرکزونو مشکلات یوه اندازه حل شي.
ورته مهال ارزګان ولايت کې د ولايتي روغتون سرطبيب ډاکټر عبدالغفار وطنوال وايي، د دغه ډول مرستو په ترسره کيدو سره اوس په ولايتي روغتون کې ډیرې ستونزې حل شوي دي.
هغه زیاتوي:«د پخوا په پرتله په ولايتي روغتون کې شته ستونزې حل شوي او په دې ورستيو کې زيات تغيرات راغلي دي موږ په ورځني ډول تر ۹ سوه پورې ناروغان چې ۷ يا ۸ سوه ورځني او ۱۰۰ تنه نور بیا دبستر ناروغان دي درملنه يې کوو.»
دغه راز ارزګان کې د طالبانو ولايتي مسوولين هم د دغه مرستو هرکلی کوي او غوښتنه کوي چې په روغتيايي برخه کې دې په راتلونکي کې هم دغه ډول مرستې ترسره شي.
خلک هم د دغه ډول مرستو ترسره کيدو ته خوښ دي خو، زياتوي چې لاهم د ارزګان په ډيرو سيمو کې خلک روغتيايي خدمتونه ته لاس رسی نه لري.
دا په داسې حال کې ده چې تردې وړاندې هم يادې موسېسې د ارزګان روغتیایي برخې سره مرسته کړې وه.
