اطلاعات روز: د هلمند ولایت د کجکي او نوزاد ولسوالیو اوسېدونکي د روغتیایي مرکزونو له نه شتون څخه شکایت کوي.
د دغو لسواليو اوسيدونکي وايي چې په سیمه کې یې هيڅ روغتیايي مرکز نشته او د یوه عادي ناروغ د درملنې لپاره اړ دي چې مرکز لښکرګاه ،ولايتونو او یا یو ګاونډي هیواد ته ناروغ انتقال کړي.
خلک وايي که د طالبانو حکومت په لېرې پرتو سيمو کې روغتیاي مرکزونه جوړ نه کړې نو د دوی نارغان به د لارو په اوږدو کې هره ورځ ساه ورکړي.
د کجکي ولسوالۍ د زمین داور د سیمې یو اوسېدونکي شرین د اطلاعات روز سره په خبرو کې وويل چې په سیمه کې یې یو روغتیایي مرکز هم نشته او دوی له ګڼو ستونزو سره لاس او ګريوان دي.
هغه زیاتوي، که یې په سیمه کې روغتیایي مرکز جوړشي، نو دوی به اړ نه وي چې خپل ناروغ لښکرګاه یا نورو ولایتونو ته ولېږدوي .
دی وایي:«زموږ په سيمه کې هیڅ روغتیایي کلینیک نشته اوس په په دې ګرمه هوا کې په ساعتونو، ساعتونو مزل کوو او خپل ناروغان لښکرګاه ته راوړو زموږ غوښتنه دا ده چې د طالبانو حکومت دې زموږ په سیمه کې روغتیایې مرکز جوړ کړي.»
د ده په خبره چې د دوی ولسوالۍ ته د روغتیا په برخه کې په تېرو ۲۰ کلونو کې هېڅ پام نه دی شوی.
د نوزاد ولسوالۍ اوسېدونکی مولوي عیسی جان بیا وایي چې، د دوی په سيمه کې روغتیایي کلینیک نشته او ټینګار کوي چې په سیمه کې یې یو لوی روغتیایي مرکز جوړ شي تر څو دیادې سیمې د اوسېدونکو روغتیایي ستونزې هوارې شي.
ده وویل:«زموږ په سيمه کې هیڅ روغیتایي مرکز نشته نو ځکه دلته بست روغتون ته مو خپل ناروغان راوړي که چیرې هلته روغتیایي مرکز موږ ولرو بیا نو اړتیا نشته چې تر دې ځایه څلور پنځه زره کرایه ورکړو.»
د افغانستان د بېلابېلو ولايتونو په لېرې پرتو سيمو کې عام خلک روغتيايي خدمتونو ته لاس رسۍ نه لري او له ګڼو ستونزو سره لاس او ګريوان دي.
په همدې حال کې د هلمند د عامې روغتیا رییس ډاکټر سیداحمد سعید اطلاعات روز ته وویل، چې په تېرو ۵ میاشتو کې دیاد ولایت په ځینو ولسوالیو کې ۵۶ روغتیاتي مرکزونه جوړ شوي او د پاتې ۳۰ کلینیکونو لپاره یې وزارت ته وړاندیزونه کړی، چې په جوړولو سره به یې د دغه ولایت د ډیرو ولسوالیو د اوسیدونکو ستونزې هوارې شي.
سعید زیاته کړه:«موږ د موسېساتو په همکارئ په تېرو ۵ میاشتو کي ۲۹ کلینکونه جوړ کړي دي خو بسنه نه کوي وزارت ته مو تازه د ۳۰ نورو کلینیکونو وړاندیز کړی چې دهغه په منلو سره به په بېلابېلو ولسوالیو کې نوي کلینیکونه جوړ شي.»
دیادونې وړ ده چې، نه یوازې د هلمند لېرې پرتې سیمې له معیاري روغتیایي خدمتونو او تجهیزاتو بې برخې دي، بلکې د افغانستان په ډېری ولایتونو کې هم هېوادوال له ورته ستونزو سره مخ دي.
