اطلاعات روز: د هرات د یوه جومات خطیب مولوي مجیب الرحمن انصاري په کابل کې د طالبانو له لوري د دیني عالمانو په جوړه شوې غونډه کې ویلي، څوک چې د طالبانو د نظام پر وړاندې سر راپورته کوي باید سر یې ووهل شي.
د باختر دولتي خبري آژانس چې د طالبانو تر کنترول لاندې فعاليت کوي، د انصاري څرګندونې خپرې کړي دي.
هغه ویلي: «هر هغه څوک چې د اوسني حکومت پر وړاندې سر پورته کړي، بايد سر یې ووهل شي.»
مولوي مجیب الرحمن انصاري د هرات د ګذرګاه شریف د جومات ملا امام دی. نوموړی یو له هغو سخت دریځو ملایانو څخه دی چې د تېر حکومت پر مهال یې څرګندونې ډېر ځله غبرګونونه راپارولي وو.
نوموړي په نننۍ غونډه کې له طالبانو څخه پر ملاتړ ټینګار کړی دی.
په کابل کې د طالبانو له خوا پلان شوې د دیني عالمانو او قومي مخورو غونډه نن (پنج شنبه، ۹ د چنګاښ) د دغې ډلې د لومړي وزیر ملاحسن اخند په وینا پیل شوه.
د طالبانو په وینا په دې غونډه کې تر ۳۵۰۰ زیاتو عالمانو او قومي مخورو ګډون کړی دی.
دا غونډه د تړلو دروازو تر شا او د رسنیو له مستقیم پوښښ پرته دا مهال روانه ده.
د طالبانو مخالفینو په کابل کې د علماوو د غونډې جوړېدل د دې ډلې لخوا د مشروعیت د ترلاسه کولو هڅه بللې ده.
دغه راز په دغه غونډه کې ښځو ته په برخه نه ورکولو توندې نیوکې شوي؛ خو طالبان وايي چې د ښځو استازیتوب نارینه کوي ځکه چې نارینه د ښځو اولادونه دي.
