اطلاعات روز: د کندهار ښار د لسمې حوزې په مربوطاتو کې طالب ځواکونو پر ملکي وګړو ډزې کړي چې په پايله کې یې دوه تنه ټپيان شوي دي.
کندهار کې یوې ځايي سرچينې اطلاعات روز ورځپاڼې وویل، چې طالب ځواکونو نن (سه شنبه، ۷ د چنګاښ) له غرمې مخکې د ښار په لسمه حوزه کې پر ملکي وګړو ډزې کړي دي.
سرچينه زياتوي چې په ډزو کې دوه ملکي کسان ټپیان شوي او نور چاته زیان نه دی رسیدلی.
په ورته وخت کې کندهار کې د طالبانو امنيتي مسوولين دغه خبر تائیدوي او وايي، چې د دوی امنيتي کسانو څخه په تېروتنه کې څو خطايي ډزې شوي.
دوی زياتوي چې د پېښې ټپيان يې روغتون ته انتقال کړي او اوس يې روغتيا حالت د ډاډ وړ دی.
د يادونې وړ ده چې تر دې څو مياشتې وړاندې هم د طالبانو امنيتي ځواکونو په کندهار ښار کې پر یوې رکشې خطايي ډزې کړې وې، چې په پایله کې يې يوه ښځه مړه او د يو نارينه په ګډون دوې نورې ټپیانې شوې وې.
د يو بل خبر له مخې بيا تېره ورځ د کندهار ولايت په ښکته ميوند ولسوالۍ کې يو ليونی سړی له ډېرې تندې څخه مړ شوی.
د ښکته ميوند ولسوالۍ له پاره د طالبانو امنیې قومندان حافظ عبدالخالق وايي، تېره ورځ په دغې ولسوالۍ کې يو کس د شديدي تندې څخه خپل ژوند له لاسه ورکړی دی.
دی وایي ياد کسان معتاد و او ترڅنګ يې رواني ناروغۍ هم درلوده.
