اطلاعات روز: ننګرهار کې هغه مېرمنې چې د لاسي صنایعو کاروبار کوي، د بازار له نشتوالي شکایت کوي او وایي، چې د طالبانو راتګ سره سم د دوی کاروبار خراب شوی او د توکو پلور یې په ټپه دریدلی.
جملیه په جلال اباد ښار کې د لاسي صنایع کاروبار کوي، هغه وايي، چې د تېر حکومت پر مهال يې په کور کې د ښځو لپاره لاسي غاړې، ماشومانو لپاره خولۍ او ځينې نور توکي جوړول او یاد توکي به یې په ځینو نندارتونو کې پلورل.
نوموړې اطلاعات روز ورځپاڼې ته وویل، چې اوس یې کاروبار په ټپه درېدلی او په خبره یې، دمګړۍ یې د لاسي غاړو جوړول د دې له امله درولي، چې بازار نه لري او د تیر حکومت په څېر د مېرمنو لپاره ځانګړي مارکېټونه او نندارتونونه نشته.
جمیله زیاتوي:«زه دلته په کور کې د لاسي صنایع په برخه کې کار کوم څو نورې میرمنې هم راسره دي خو د طالبانو د حکومت په راتګ سره زمونږ کاروبار بیخي خراب شوی او هر څه په ټپه دریدلي دي، چې له امله یې زمونږ کورنی اقتصاد هم خراب شوی او لامل یې دحکومت له لوري میرمنو ته نه پاملرنه ده، مخکې خو به مونږ خپل توکي بازار کې خرڅول او نندارتونونو کې خو اوس هیڅ نشته.»
هغه وایي اوسمهال یې کورنی اقتصاد ورځ تربلې مخ په خرابیدو دی او له طالب چارواکو غوښتنه کوي،چې فعالیتونو ته یې اجازه ورکړي او د لاسي توکو د پلور لپاره اسانتیاوې ورته برابرې کړي؛ تر څو د خپلې کورنۍ لومړنۍ اړتیاوې پوره کړای شي.
نوموړې وایي، چې پخوا به یې په خپل لاس د جوړو شويو توکو له درکه د میاشتي له زرګونه افغانیو عاید ترلاسه کاوه او د کورنۍ اړتیاوې یې ورباندې پوره کولې.
جمیله وايي، اوس یې جوړ شوي ګنډونه، د ماشومانو لپاره خولۍ او د مېرمنو لپاره لاسي جوړې شوې جامې په کور کې اېښې او د پلور لپاره یې بازار او نندارتون نشته.
جملې زیاته کړه: « له همدې لاسي صنایع له لارې به ما مخکې د کور اړتیاوې پوره کولې او کورنی اقتصاد مو ښه و، خو اوس نه حکومت د فعالیت اجازه راکوي او نه کوم توکي چې په لاس جوړ شوي بازار لري چې اوس په کور کې پراته دي، غوښتنه کوو چې میرمنې ته دې په هره برخه کې د فعالیت اجازه ورکړل شي څو دوی خپل کورنۍ اقتصاد پیاوړی کړي.»
یوې بلې میرمنې چې نه یې غوښتل نوم یې خپور شي اطلاعات روز ورځپاڼې ته وویل، په دغه ولایت کې ګڼې نورې مېرمنې هم شته، چې د لاسي توکو د جوړولو له درکه یې د خپلې کورنۍ اړتیاوې پوره کولې، خو هغوی هم د دې په څېر د کورنۍ سرپرستان نه لري او ان ځینې یې د کاروبار د نشتوالي او تنګسیا له کبله د سړک پر سر خیرات ټولولو ته اړې شوې دي.
دغه مېرمن د طالبانو له اړوند مسوولینو تر څنګ له نړیوالې ټولنې او نورو مرستندویه بنسټونو څخه غواړي، چې له مېرمنو سره مرسته وکړي، پر کاروبار بندیزونه ختم او د لاسي توکو لپاره بازارموندنه ورته وکړي.
ننګرهار کې یوازې د لاسي صنایع په برخه کې دا میرمنې نه دي چې کاروبار یې په ټپه درېدلی؛ بلکې د دوی په څېر ډېرې نورې مېرمنې هم شته، چې د کورنۍ سرپرستان یې له لاسه ورکړي او اوس له ګڼو اقتصادي ستونزو سره مخ دي.
