اطلاعات روز: د پکتیا ولایت په سیدکرم ولسوالۍ کې د ناوړه دودونو د مخنیوي په موخه قومي پرېکړه شوې، چې د جلۍ ولور یې څلور لکه افغانۍ ټاکلی.
د دغې ولسوالۍ اوسېدونکو او قومي مشرانو ویلي، چې له دې وروسته به د جلۍ ولور له ۴ سوه زره افغانیو پورته نه وي او که له دې پرېکړې کوم کس سرغړونه وکړه، نو قوم ته به ټاکلې ناغه ورکوي.
د یادې ولسوالۍ د قندرخېلو سیمې یو تن قومي مشر ملا طارق وايي، په ټولنه کې د ناسمو دودنو له امله ډېر کله د کورنیو ترمنځ دوستي په دوښمنۍ بدلې شوي، چې د دې د مخنیوي لپاره اوس قومي مشرانو پرېکړه کړې، تر څو په ودونو او نورو مراسمو کې د ناوړه دودونو مخه ونیول شي.
هغه زیاتوي، چې د شوې پرېکړې له مخې د ودونو او نورو مراسمو کې د زیاتو او بې ځایه مصارفو مخنیوي ترڅنګ د جلۍ ولور هم راښکته شوی دی.
نوموړي وویل: «مونږ پرون پرېکړه وکړه، چې له دې وروسته به په سیدکرم ولسوالۍ کې د ناوړه دودونو مخه نیول کیږي او که چا سرغړونه وکړه قوم ته به د شرم په ډول ناغه ورکوي.
په دغه پرېکړه کې د زیات مصرف کولو څخه منعه شوې او هم د جلۍ ولور په کې د پخوا په پرتله د پام وړ ۴ سوه زره افغانۍ ټاکل شوی دی.»
په همدې حال کې بیا د سیمې یو بل اوسېدونکي جمال الدین شوې پرېکړه ښه ګام بولي او په عملي کېدو یې ټینګار کوي.
هغه وايي، د زیات ولور او نورو بېځایه مصارفو له امله ځوانان مجبوریږي، چې د پوره کېدو لپاره یې بهر ته په مرګونو لارو د مزدورۍ لپاره لاړ شي.
نوموړی د پکتیا ولایت د نورو سیمو له اوسېدونکو هم غوښتنه کوي، چې په خپلو قومونو کې د ناوړه دودونو د مخنیوي لپاره قومي پرېکړې وکړي.
هغه وايي: «مونږ له دې پرېکړې هرکلی کوو او غوښتنه مو دا ده، چې یاد تړون ته باید ټول غاړه کېږدي او چاته اجازه ور نه کړي، چې سرغړونه ترې وکړي. زما د پکتیا ولایت له نورو قومونو هم دا غوښتنه ده، چې ورته پرېکړې وکړي او د ناوړه دودونو د مخنیوي لپاره کلکه مبارزه وکړي.»
د یادونې وړ ده، چې په ورته مهال په سیدکرم ولسوالۍ کې د دوو کورنیو ترمنځ ۶۰ کلنه دوښمنۍ چې له امله یې په خپل منځ کې ځینې کسان وژل شوي و، د قومي مشرانو په همکارۍ حل او دواړو غاړو د دوستۍ لاس ورکړ.
د قومي پرېکړو په دوام له دې وړاندې د پکتیا ولایت په زرمت، څمکنیو ، پټان او ځینو نورو ولسوالیو او سیمو کې هم ورته تړونونه شوي، چې تر ډېره عملي او ښه پایله یې ورکړې ده.
