اطلاعات روز: زابل کې روغتیایي مسوولین وایي، په دې ولایت کې لسګونه کسان په یوې نامعلومې ناروغۍ اخته شوي چې اوس تر جدي درملنې لاندې دي.
زابل کې د عامې روغتيا ریيس ډاکټر عبدالحکیم حکيمي اطلاعات روز ورځپاڼې ته وويل، د دې ولایت په ارغنداب، سیوري او شهر صفا ولسوالیو کې په يوې نامعلومې ناروغۍ چې د کولرا شک پرې کېږي شاوخوا ۴۰ تنه اخته شوي دي.
د ده په وينا د کومو کسانو روغتيايي حالت چې د اندیښنې وړ و، هغه يې د زابل ولايتي روغتون ته انتقال کړي او د پاتې نورو ناروغانو درملنه یې هماغلته په ولسواليو کې شروع کړې.
ډاکتر حکيمي زیاته کړه، چی د ناروغۍ د تشخیص له پاره يې ټيمونه سيمي ته لېږلي او کلينيکي څېړونو څخه داسې ښکاري چې کولرا ناروغي ده.
د يادونې وړ ده چې تر دې وړاندې هم په دې ناروغۍ باندې سلګونه کسان اخته شوي وو، چې له هغې جملې يو تن خپل ژوند له لاسه ورکړ او پاتې نور يې روغ شول.
د افغانستان په ډېر شمېر سيمو کې هر کال سلګونه کسان په کولرا ناروغۍ اخته کېږي چې له هغې جملې يو شمېر رغېږي او د ګوتو په شمېر ناروغان يې د نه درملنې له کبله خپل ژوند د تل له پاره له لاسه ورکوي.
ډاکټران وايي د ګرمۍ په موسم کې بايد تر نورو وختونو خلک دېر د خپلو خوړو او څښاک اوبو ته پام وکړي تر څو له دغه ډول ناروغيو څخه په امن کې پاتې شي.
