اطلاعات روز: په پنجشیر ولایت کې ځایي سرچینې وايي، طالبانو د دغه ولایت په پریان ولسوالۍ کې یو پلار او زوی په ډزو وژلي او څه باندې لس نور ملکي کسان یې بندیان کړي دي.
د سرچينې د معلوماتو له مخې، محمدشاه او زوى يې جاويد، طالبانو د «مقاومتجبهې» سره د اړيکو په تور په ډزو وژلي او د محمدشاه ورور د دغې ډلې له خوا نیول شوی دی.
یوې باوري سرچینې اطلاعات روز ورځپاڼې ته وویل چې دغه کسان نن (دوشنبه، ۱۶ د غبرګولي) د پنجشېر ولایت د پریان ولسوالۍ په «یلاقنشین» سیمه کې په ډزو وژل شوي دي.
د هغه په وینا، د مولوي حبیب الله حسام د تره زوی محمد شاه د «مقاومت جبهې» د مشرتابه غړی و.
د پنجشیر سیمه ییزو طالبانو تر اوسه په دې اړه څه نه دي ویلي.
طالبانو تر دې مخکې هم په پنجشیر ولایت کې خلک د «مقاومتجبهې» سره د اړیکو په تور بندیان کړي، شکنجه کړي او وژلي دي.
تېره اونۍ یو سړی هغه مهال طالبانو ونیوه او تر شکنجې لاندې یې ووژه چې غوښتل یې غره ته پورته شي او د شپونکي څخه د خپلې رمې پوښتنه وکړي.
په پنجشېر کې سرچينې وايي، چې په دغه ولايت کې سيمه ييز طالب چارواکو د دغه سړي له کورنۍ سره په ليدنه کې ومنله، چې نوموړي د دوى تر شکنجې لاندې ساه ورکړې. د سرچينې په وينا، طالبانو د وژل شوي کس کورنۍ ته د تاوان ورکولو ژمنه کړې.
