لوګر ولایت کې لسګونه دیني عالمانو په یوې راټولېدنه کې له طالبانو غوښتي، چې په عامه ځایونو او جوماتونو کې د چاودنو مخنیوی وکړي.
دغه عالمان په داسې حال کې د یادو بریدونو د مخنیوي غوښتونکي دي، چې په دې وروستیو کې په پلازمینه کابل او ځینو نورو ولایتونو کې د چاودنو له امله ګڼو ملکي وګړو ته مرګ، ژوبله واوښته.
دیني عالمان وايي، که طالبان په اهل تشیع وګړو د بریدونو مخه و نه نیسي او د هغوی د امنیت خوندیتوب لپاره هڅې و نه کړي، نو هیواد کې به مذهبي تفرقه رامنځته شي.
په دې اړه یو تن دیني عالم وویل: «مونږ په جوماتونو کې په اهل تشیع وګړو وروستي بریدونه غندو او دا د خورا اندېښنې وړ خبره ده، په دې کې د طالبانو حکومت مسوول دی، دوی باید د هر چا امنیت تامین کړي او دې ته لاره هواره نه شي، چې خدای مه ګړه هیواد کې مذهبي جګړه پیل شي.»
دیني عالمانو همدا راز په اسلامي هیوادونو غږ وکړ، چې د افغانانو اقتصادي ستونزو ته په کتو باید خپلو همکاریو ته دوام ورکړي.
د دوی په وینا چې تر اوسه هیڅ اسلامي هیواد د افغانانو د شته ستونزو هواري لپاره د پام وړ هڅې نه دي کړي.
دیني عالم قاری نور صادق زیاتوي: «مونږ د افغانانو په اوسني ستونزمن حالت کې د لاسنیوي لپاره چې څومره اسلامي هیوادونو ته تمه وه، هماغسې و نه شول او د خپلو شخصي ګټو او د امریکا د خوشحاله کولو لپاره یې له افغانانو سره نه یوازې همکاري و نه کړه، بلکې لا یې په اوس وخت کې فاصله اخیستې ده.»
له لوګر وړاندې د هیواد په ځینو نورو ولایتونو کې هم خلکو په ملکي وګړو د بریدونو له امله اندېښنه څرګنده کړې او په مخنیوي کې یې د طالبانو امنیتي مسوولین مسوول بللي دي.
