کمیتهی امنیت ملی تاجیکستان اعلام کرده است که سه «قاچاقچی» اهل افغانستان در درگیری با مرزبانان این کشور کشته شدهاند.
به گزارش خبرگزاری خاور، کمیتهی امنیت ملی تاجیکستان گفته است که این درگیری دیشب (پنجشنبه، ۹ دلو) در ساحهی بهارک ولسوالی شمسالدین شاهین ولایت ختلان این کشور رخ داده است.
کمیتهی امنیت ملی تاجیکستان گفته است که پنج «قاچاقچی» از خاک افغانستان وارد این کشور شدند و از دستور مرزبانان برای تسلیمی اطاعت نکردند و ضمن مقاومت مسلحانه، تلاش کردند که به افغانستان فرار کنند.
این کمیته افزوده است که در نتیجهی درگیری سه نفر که اهل ولسوالی چاه آب ولایت تخار افغانستان هستند کشته شدند و دو نفر دیگر با استفاده از تاریکی شب توانستند به افغانستان فرار کنند.
کمیتهی امنیت ملی تاجیکستان گفته است که از محل درگیری سه قبضه کلاشینکف، ۱۵۰ گلوله، ۷۳ بسته مواد مخدر از نوع حشیش و تریاک با مقداری وسایل دیگر کشف و ضبط کرده است.
ولایت ختلان در جنوب تاجیکستان و هممرز با افغانستان در ماههای اخیر شاهد افزایش ناامنی و درگیریهای مسلحانه بوده است.
دولت تاجیکستان در چندین مورد اعلام کرده است که این حملات از مناطق مرزی افغانستان انجام شده است.
طالبان پیش از این اعلام کرده بودند که در مورد حملات از افغانستان به تاجیکستان تحقیق میکنند، اما تا اکنون نتایج این تحقیق را اعلام نکردهاند.
