وزارت خارجهی تاجیکستان اعلام کرده است که در یک حملهی مسلحانه از خاک افغانستان، سه شهروند چین در ولایت ختلان کشته شدهاند.
این وزارت در اعلامیهای گفته است که این حمله دیشب (چهارشنبه، ۵ قوس) به کارمندان شرکت «شاهین اسامالالسی» رخ داده است.
در اعلامیهی وزارت خارجهی تاجیکستان آمده است: «در نتیجهی این حمله که با استفاده از سلاح گرم و یک پهپاد حامل نارنجک انجام شد، سه کارمند شرکت شاهین اسامالالسی، که همگی شهروندان چین بودند، کشته شدند.»
این وزارت افزوده است که «با وجود تلاشهای مداوم طرف تاجیک برای حفظ امنیت و ایجاد فضایی از همکاری متقابلا سودمند در مناطق مرزی تاجیکستان و افغانستان، گروههای جنایتکار فعال در کشور همسایه همچنان به اقداماتی با هدف بیثباتکردن اوضاع در مناطق مرزی ادامه میدهند.»
وزارت خارجهی تاجیکستان با ابراز نگرانی عمیق، این اقدامات شنیع «گروههای جنایتکار» را بهشدت محکوم کرده است. این وزارت از طالبان خواسته است تا اقدامات مؤثری را برای تأمین ثبات و امنیت در مرزهای دولتی دو کشور همسایه انجام دهند.
طالبان تا کنون به این اعلامیهی وزارت خارجهی تاجیکستان واکنش نشان ندادهاند.
این حمله در حالی صورت گرفته است که یک هیأت از طالبان به رهبری والی این گروه در بدخشان به تاجیکستان سفر کرده است.
