پوتین: برای مقابله با تهدیدهای امنیتی در مرز افغانستان از خود دفاع می‌کنیم

اطلاعات روز: ولادیمر پوتین، رییس جمهور روسیه در سفرش به تاجیکستان گفته است درصورت نیاز، برای مقابله با تهدیدهای امنیتی در مرز افغانستان از پایگاه نظامی‌اش در تاجیکستان استفاده خواهد کرد.
آقای پوتین که به روز دوشنبه از تاجیکستان دیدار کرده گفت روسیه برای مقابله با تهدیدهای مرزی با افغانستان، در کارگرفتن از پایگاه نظامی‌اش در تاجیکستان با امام علی رحمان به توافق رسیده است.
روسیه و تاجیکستان اوضاع مشکل‌ساز افغانستان را زیر نظر دارد و حضور و فعالیت داعش در افغانستان مسکو را بر آن داشته است گزینه‌ی استفاده از پایگاه نظامی‌اش در تاجیکستان را روی میز بگذارد.
امام علی رحمان، رییس جمهور ترکیه نیز کار رسیدگی به تهدیدهای مرزی را با افغانستان یک اولویت خوانده است.
در میان کشورهای آسیای میانه، تاجیکستان طولانی‌ترین مرز را با افغانستان دارد. اما علی رحمان در این مورد گفته است: «تاجیکستان ۶۰ درصد مرزهای کشورهای مشترک‌المنافع را با افغانستان دارد و تاجیکستان در خط نخست ایستاده است، از همین رو مسئولیت بزرگ مان رسیدگی به تهدیدها از افغانستان است.»
تاجیکستان تنها کشور آسیای میانه است که روسیه در آن پایگاه نظامی دارد. تا سال 2005 نیروهای روسیه از مرز تاجیکستان با افغانستان مراقبت می‌کردند و بعد از آن حفاظت از مرز به عهده‌ی مرزبانان تاجیک واگذار شد.
پایگاه روسیه در تاجیکستان هفت هزار نیرو دارد که به باور روسیه حضور آنان ثبات منطقه را ضمانت می‌کند.
این نگرانی‌ها درحالی مطرح می‌شود که چندی پیش صلاح‌الدین ربانی، سرپرست وزارت خارجه‌ی کشور در سفری به تاجیکستان گفت افغانستان به هیچ گروهی اجازه نمی‌دهد از خاکش تهدیدی را متوجه کشورهای همسایه بسازد.