بیش از 200 جنگ‌جوی خارجی در مرز افغانستان و تاجیکستان جابه‌جا شده‌اند

اطلاعات روز: مسئولان محلی ولایت قندوز می‌گویند که بیش از 200 جنگ‌جوی خارجی به شمول 40 جنگ‌جوی تاجیکستانی، در مرز افغانستان و تاجیکستان جابه‌جا شده‌اند.
امان الدین قریشی، ولسوال امام صاحب قندوز گفته است که براساس اطلاعات موجود، در حدود 200 جنگ‌جوی خارجی در نواحی مرزی افغانستان و تاجیکستان در آن سوی دریای آمو پناهگاه ساخته‌اند.
آقای قریشی هم‌چنان افزوده است که گروه طالبان نیز در این منطقه، ساخت ماین را از انجنیران تاجیکستانی آموزش می‌بیند.
به گفته وی، جنگ‌جویان خارجی در زمان عملیات نیروهای امنیتی، در آن ‌سوی دریای آمو در منطقه موسوم به قلم گذر (جنگلات مربوط به تاجیکستان) پناه می‌برند.
پیش از این نیز خبرهایی مبنی بر حضور تروریستان در مرز دو کشور به نشر رسیده بود. اما این برای اولین‌بار است که گزارش‌هایی از ایجاد پناهگاه‌های طالبان در مرز دو کشور منتشر می‌شود.
قریشی گفته است که برای پاک‌سازی کامل ولسوالی امام صاحب در مرز تاجیکستان و افغانستان از حضور تروریستان نیاز به راه‌اندازی عملیات گسترده است.
پیش از این گزارش‌هایی هم منتشر شده بود که در مرز افغانستان و تاجیکستان، تروریستان؛ جوانان و کودکان را برای انجام حملات انتحاری و نحوه کارگذاری ماین‎ها آموزش می‌دهند.