اطلاعات روز: هلمند کې د طالبانو سيمه ييز چارواکي وايي دوی په دغه ولايت کې پر هغو مالدارانو حيواني خوراکه ويشلې چې حيوانات يې د خوراکې له کمښت سره مخ وو.
د هلمند ولايت د کرنې او مالدارۍ رياست لخوا څخه اطلاعات روز ته په راليږل شوې خبرپاڼه کې راغلي چې دغه مرستې د کندهار مهاجرینو یا KRO موسېسې په مالي همکارۍ چمتو شوې وې.
خبرپاڼه ليکي چې دوی يادې مرستې د یوې ګډې کمیټې لخوا تر شفافي سروې وروسته مستحقو کسانو ته ورکړې دي.
دغه خبرپاڼه کې لیکل شوي :« یاده متراکمه حیواني خوراکه د مالونو د شیدو په زیاتوالي ، روغتیا او مړښت برخه کې ګټوره ده چې تر ډیره ورته مالداران زیات خوشحاله دي.»
په ورته وخت کې هغه مالداران چې حيواني خوراکي مواد يې ترلاسه کړي دي وایي، چې حيوانات يې د ناروغيو له خطر سره هم مخ دي او له دوی سره دې د حیواني درملو، واکسینونو او د عامه پوهاوي په برخه کې مرستې وشي.
د طالبانو د کرنې او مالدارۍ اداره وايي دوی هڅه کوي چې د بهرنیو مرستندویانو د مرستو لړۍ نورو ولسوالیو ته هم وغځوي تر څو په محلي کچه د مالدارانو ملاتړ وشي او له همدې لارې یې په اقتصادي بهیر کې نوښت او بهبود رامنځته شي.
افغاستان چې يو کرنيز هېواد دی ډير خلک يې کورنۍ اړتیاوې د کرنې او مالدارۍ له لارې پوره کوي خو لا تر دې دمه په هېواد کې د کرنې او مالدارۍ په برخه کې کوم د پام وړ پرمختګ نه دی راغلی.
