اطلاعات روز: نارنج ګل دودیزه مشاعره د هیواد له بیلا، بیلو سیمو څخه راغلو لیکوالانو، شاعرانو، ادیبانو، طالبانو او عامو خلکو ګډون سره ترسره شوه.
د مشاعرې د پيل پرمهال د ننګرهار لپاره د طالبانو د اطلاعات او کلتور رییس قاري نورمحمد حنیف له شاعرانو وغوښتل، چې په خپلو شعرونو کې خلک سولې، امن او د هېواد ابادۍ ته وهڅوي.
حنیف زیاته کړه:« دا مشاعر په ټوله معنی د سولې او امن په فضا کې ترسره کېږي، موږ باور لرو، چې درانه شاعران به په خپلو شعرونو کې خلک ابادۍ، سوکالۍ او امن ته وهڅوي.»
په ورته وخت کې د افغانستان د ملي تلوېزیون مرستیال مولوي ضیاء الحق حقمل د نارنج ګل دودیزې مشاعرې د ارزښت په اړه خبرې وکړې.
نوموړي له شاعرانو هم وغوښتل د ټولنې ستونزو او ناخوالو ته دې په خپلو شعرونو کې ځای ورکړي او په هنري ژبه دې ولس ته وړاندې کړي.
حقمل زیاتوي:« نارنج ګل د هېواد په کچه نه، د سیمې په کچه یو له هغو مشاعرو څخه ده، چې ګڼ شمېر شاعران او د ادب مینه وال په کې ګډون کوي او خپل شعرونه په کې له خلکو سره شریکوي.»
د نارنج ګل مشاعره هر کال د پسرلي په رنګینیو کې د هېواد د ګڼ شمېر لیکوالانو، شاعرانو او عامو خلکو په ګډون ترسره کېږي، چې په کې شاعران د شعر په ژبه خلکو ته د مینې ، ورورګلوۍ او آبادۍ پيغامونه ورکوي.
دا مشاعره د حمل په لسمه ماسپښین پيل او د شپې تر ناوخته یې دوام وکړ، چې په کې د هېواد له بېلابېلو سیمو څخه راغلو شاعرانو د خپلو شعرونو خواږه له خپلو مینه والو سره شریک کړل.
د مشاعرې په څنډه کې د کورنیو تولیداتو درې ورځنی نندارتون هم په لاره اچول شوی، چې تر ۳ ورځو به د خلکو پر مخ پرانیستی وي.
