اطلاعات روز: په هېواد کې ترسياسي بدلون وروسته خلک له زياتو اقتصادي ستونزو سره مخ دي او د خلکو کار روزګار په ټپه ولاړ دی.
ارزګان کې د نورو ولايتونو په څير خلک وايي، مرستو ته اړتيا لري او دولت دي ورسره په بيلابیلو برخو کې مرستې وکړي.
ددغه ولايت اوسيدونکي وايي له يوې خوا د کار نه شتون او له بل پلوه د توکو لوړ قيمتونو څخه سخت په تنګ راغلي دي او د شپې تیریدو لپاره هیڅ هم نه لري.
زر بيبي چې په مرکز ترينکوټ کې د خپلې ۷ کسيزې کورنۍ ساتنه او پالنه کوي وايي، په تيرو وختونو کې به يې په ښار کې خیرات ټولولو مګر اوس خیرات څوک نه ورکوي. نموړې ميرمنې له مرستندويه ارګانونو او د طالبانو څخه غوښتنه وکړه چې له دوئ سره مرستې وکړي.
هغه وايي: «پخوا مې په ښار کې خیرات ټولولو دومره ډوډۍ به مې پیدا کوله چې شپه پرې تيره کړم خو، اوس چې هره څه ګران شوي دي، کور کې مې هيڅ هم نشته».
شاه ګله بیا بله هغه ميرمن ده چې په کورنۍ کې يو معيوب زوی لري وايي هره ورځ مرستدويه موسیساتو ته ورځې خو هغوئ ورته هيڅ پام نه کوي او مرستې پر خپلو خپلوانو ویشي. هغه وايي ژمۍ يې په ډيرو ستونزو کې تیر کړ، د کور توکي یې د ډوډۍ په بدل کې خلکو ته ورکړل او نور د شپې تیریدو لپاره کور کې هيڅ نه لري.
دې وويل: « ځوانان خلک وي هغوئ ته مرستې ورکوي خو موږ ته نه رسيږي موږ په کور کې هيڅ هم نه لرو اخر موږ څه وکړو ژمی مې په ډيرې سختۍ تير کړی نور قسم دی که هيڅ هم لرمه».
عبدالباري چې د ارزګان ولايت د سرخوم سيمې اوسيدونکی دی طالبانو څخه د مرستو غوښتنه کوي او زياتوي چې یا دې طالبان ورته کار زمینه برابره کړي او یا دې ورسره مرسته وکړي ځکه په کور کې خوراک لپاره څه نه لري.
ده وويل: « موږ کور کې شل تنه یو، ټولو ته زه ډوډۍ پیدا کوم، ټول وطن کې څوک ډوډۍ نه لري باید د خلکو سره مرسته وشي زه هره ورځ ښار کې کار پسې ګرځم خو، نه پیداکيږي».
په ورته وخت کې ارزګان کې د طالبانو ولايتي چارواکي مني چې خلک له اقتصادي ستونزو سره مخ دي او وایي چې دامهال د يو شمير موسېساتو لخوا څخه خلکو ته د بشري مرستو ویش دوام لري.
دارزګان ولايت مقام لپاره د طالبان وياند قاري محمود مدثر يې په اړه اطلاعات روز ته وويل چې له موسېساتو سره غږيدلی او هڅه کوي چې مرستې خلکو په شفاف ډول وویشل شي.
مدثر وایي « دارزګان والي د موسېساتو سره وخت پر وخت غږیږي، ترڅو ټولو خلکو ته بشرې مرستې ورسوي زموږ هڅه ده چې دارزګان ليري پرتو سيمو ته هم دغه بشرې مرستې ورسول شي موږ د مرستو د سروې لپاره خپل کسان هم د موسېساتو سره يو ځاي کړي دي.»
دا په داسې حال کې ده چې د ماشومانو د ساتنې نړیواله اداره (Save the children) وایي، په افغانستان کې اوس مهال ۹۶ سلنه کورنۍ محدودو خوړو ته لاسرسی لري او یا داسې خواړه خوري چې نه یې غواړي.
