اطلاعات روز: کندهار لپاره د طالبان والي محمديوسف وفا په کندهار کې د څاګانو له خاوندانو غوښتي چې د خپلو سر لوڅه څاګانو سرونه پټ کړي او زياته کړې یې ده که په کومې سرلوڅې څاه کې ماشوم وليږي، د څاه خاوند به محکمه کړي.
والي دغه څرګندوني په کندهار کې د هغه کس سره په ليدنه کې وکړي چې د تيرې دوشنبې په ورځ يې په خاکرېز سيمه کې يوه اته کلنه ماشومه د ۱۰۵ متره څاه څخه په ځانګړي مهارت راويستل.
کندهار والي په خپلو خبرو کې د طالبانو د کورنيو چارو د سرپرست وزير سراج الدین حقاني د هدایت مطابق د کندهار ښار د ټولو حوزو آمرینو، د ولسوالیو امنیه قومندانانو، ولسوالانو او اړونده ادارو ته سپارښتنه وکړه، ترڅو اړونده سیمو کي هر وخت په تکراري ډول ټولو برمه وهونکو او د سیمو اوسېدونکو ته ځانګړې لارښوونه وکړي چې د خپلو برمو سرونه ورته پټ کړي.
محمديوسف وفا وويل که بیا ځلې دغه ډول پيښه تکرار شي د څاه خاوند به محکمه شي.
هغه په ورته وخت کې د هغه کس ستاينه وکړه او پګړۍ يې ورته پر سر کړه چې تر ۲۳ ساعتونو د ژغورنې عمليات ترسره کيدو ورسته يې په څاه کې بند پاتې ماشومه وژغورله.
والي وويل هغه ماشومه چې څاه ته لوېدلې وه او وژغورل شوه چې دا مهال يې روغتيايي حالت ښه دی.
د امين الله په نوم هغه کس چې ياده ماشومه يې مرګ څخه ژغورلې ده، وايي چې له تېر یوه کال راهیسي یې د یادې مشینرۍ پر جوړښت کار پيل کړی و او دا یې لومړۍ ماشومه وه چې وژغورله.
د کندهار ولايت مقام مسوولين وايي د تيرې پنجشنبې په ورځ د نجلۍ ژغورونکي او د يادې نجلۍ پلار د طالبانو له مشر ملا هبت الله سره هم ليدلې دي او د ملا هبت الله د دواړو سره د نغدو پيسو مرسته هم کړې ده.
په همدې وخت کې د کندهار اوسيدونکي بیا د طالبانو څخه غوښتنه کوي چې د هغو کسانو پر وړاندې چلند جدي کړي چې د خپلو څاګانو سرونه نه پټوي.
د کندهار يوه اوسيدونکي نوراغا پټان اطلاعات روز سره په خبرو کې وويل چې لاهم د کندهار په مرکز او ولسواليو کې زيات شمير سر لوڅي څاګان موجود دي او طالبان باید د هغو کسانو سره قانوني چلند وکړي چې د څاګانو سرونه لوڅ پريږدي.
هغه له خلکو څخه هم غوښتنه وکړه چې د خپلو څاګانو د سرونو خوندي ساتلو ته پام وکړي ترڅو ددغه ډول پيښو کچه ټيټه شي.
دا په داسې حال کې ده چې په دې ورستيو څو مياشتو کې په سويلي ولایتونو کندهار، هلمند، زابل او ارزګان ولايتونو کې ۹ ماشومان ژورو څاګانو ته لويدلې دي چې ۲ تنه ژغورل شوي او پاتې ۷ ماشومانو په څاګانو کې ژوند له لاسه ورکړی دی.
