اطلاعات روز: د ننګرهار جلالاباد ښار اوسیدونکي او موټر چلوونکي د سړکونو له خرابوالي شکایت کوي او وایي، د یادو سړکونو د تخریب له امله نه شي کولی پر خپل وخت ورځنۍ چارې ترسره کړي.
د خلکو په خبره د ښار په داخل کې د سړکونو د تخریب له امله ښاري بې نظمي ورځ تربلې مخ په زیاتیدو ده چې ښاریان یې له ګڼو ستونزو سره مخ کړي دي. دوی د ښار په داخل کې د تخریب شویو سړکونو د داغ ګیرۍ غوښتنه کوي.
د جلال اباد ښار اوسیدونکي صابر خان اطلاعات روز ورځپاڼې سره په خبرو کې د سرکونو د تخریب لاملونه په سړکونو د درندو بار وړونکو موټرو له معیاري وزن زیات د توکو انتقال، پر قیر شویو سرکونو د خلکو له لوري دوامداره اوبو اچول او د سړکونو د جوړیدو په وخت کې د بې کیفیته موادو کارول یاد کړل.
صابر خان زیاته کړه: «جلال اباد ښار کې تخریب شویو سرکونو له امله له زیاتو ستونزو سره مخ یو، کلونه کیږي چې دا سرکونه تخریب شوي خو تراوسه یې د بیا رغونې لپاره بنسټیز کار ونشو، د خلکوغوشتنه دا ده چې باید د ښار په داخل کې ټول تخریب شوي سړکونه باید داغ ګیري او اساسي ورغول شي.»
موټرچلوونکي هم ورته شکایت کوي او وایي، د جلال اباد ښار په بیلابیلو برخو کې پخواني جوړ شوي، سړکونه تخریب شوي او ځینې یې د تخریب له ګواښ سره مخ دي، چې د بیا لپاره اساسي ترمیم ته اړتیا لري.
یو تن موټر چلوونکي سید ادریس اطلاعات روز ورځپانې ته وویل، د تخریب شویو سړکونو له امله نه يواځې دا چې له ستونزو سره مخامخ دي، بلکې ډیر کله ورته د یادو سړکونو د خرابوالي له امله مالي زیانونه هم اوړي.
نوموړی د جلال اباد ښاروالۍ د تخریب شویو سړکونو د بیارغیدو او داغ ګیرۍ غوښتنه کوي.
سید ادریس زیاتوي: «د سرکونو د تخریب او خرابوالي له امله نه یوازې چې مونږ ته یې مالي ستونزې اړوي بلکې د سړکونو د خرابوالي او تخریب له امله ښاري بې نظمي هم رامنځته شوې او خلک له زیاتو ستونزو سره مخ دي، له ښاروالۍ غوښتنه کوو چې تخریب سړکونه دې بیا ورغوي.»
په همدې حال کې دجلال اباد ښاروالۍ ویاند بختي جان مراد اطلاعات روز ورځپاڼې ته وویل، چې د تخریب شویو سړکونو د بیارغیدو هوډ لري.
نوموړی همداراز وایي، چې د ښار په ټولو ناحیو کې د تخریب شویو سړکونو د بیا جوړیدو او داغ ګیرۍ لپاره بودیجه منظور شوې چې په نیږدې وخت کې به یې چارې پیل شي.
بختي جان مراد زیاته کړه: «د جلال اباد ښاروالۍ په پلان کې لري چې د ښار په ټولو ناحیو کې تخریب شوي سړکونه په اساسي ډول بیا ورغوي او په دې برخه کې بودیجه هم منظور شوې ده، په نیږدې وخت کې به د ښار په ټولو تخریب شویو سړکونو کار پیل شي چې ورسره به شته ستونزې حل شي.»
له تيرو څو کلنو راهیسې نيوکې دا دي چې د سړکونو جوړیدو قرادادي شرکتونه د سړکونو د جوړولو پرمهال د بې کیفیته مواد ګټه پورته کوي او حکومت پرې سم څار نه لري، چې له امله يې سړکونه بیرته ژر تخریبیږي ، خو له نوی نظام بیا د خلکو غوښتنه دا ده چې د سړکونو د جوړیدو پرمهال دي په قرادادیانو د څار ترڅنګ د پروژې په تطبیق کې د سړک کیفیت او ښه والي ته جدي پاملرنه وکړي.
