اطلاعات روز: د ننګرهار مرکز جلالاباد ښار کې خلک وایي، لا هم طالبانو د د دوی حکومت کورنیو چارو وزارت هغه پریکړه نه ده عملي کړې چې له مخې یې تفریحي ځایونو ته له وسلو سره د طالب ځواکونو په ورتګ بندیز لګول شوی دی.
د طالبانو کابینې د هغې پرېکړې خلاف چې تفریحي ځایونو ته یې له وسلو سره تګ منع کړی و، خو بیا هم په ننګرهار کې طالب ځواکونه او نور کسان له وسلو سره تفریحي پارکونو ته ځي.
د جلال اباد ښار اوسیدونکي عزیزالرحمن اطلاعات روز ورځپاڼې سره په خبرو کې وویل، اوس هم د طالب ځواکونه تفریح ځایونو ته له وسلو سره ځي او په خبره یې دا په ولس کې ویره خپروي.
نوموړی د طالبانو له اوسني حکومت غوښتنه کوي چې د یادې چارې مخنیوی دې وکړي.
عزیزالرحمن زیاته کړه: «د جلال اباد ښار کې چې کوم تفریح ځایونه دي زیاتره وخت کې په کې طالب سرتیري له وسلو سره لیدل کیږي او ګرځي، چې دا پر خلکو یو منفي تاثیر کوي، غوښتنه کوو چې دوی هم تفریح وکړي خو له وسلو سره دې تفریحي پارکونو ته نه داخلیږي، چې په دې سره د خلکو ترمنځ ویره خپریږي.»
ننګرهاریان داسې مهال دا شکایت کوي، چې څه موده وړاندې د دوی د حکومت کورنیو چارو وزارت په یوه پریکړه کې ویلي و، چې طالب ځواکونه نور اجازه نه لري چې له وسلو، یونیفورم او وسایطو سره تفريحي پارکونو ته داخل شي.
خو اوس لیدل کېږی، چې دا پرېکړه نه ده عملي شوې.
د جلال اباد ښار یو بل اوسیدونکي محمد صادق اطلاعات روز ورځپاڼې ته وویل، زیاتره وخت طالب ځواکونه له وسلو سره تفریحي پارکونو کې لیدل کیږي.
محمد صادق زیاته کړه: «د کورنیو چارو وزارت چې کومه پریکړه کړې وه چې باید تفریح ځایونو ته طالب سرتیري د اخل نشي دا پریکړه تراوسه په ننګرهار کې نه ده عملي شوې، ځکه دلته په تفریح ځایونو کې له وسلو سره طالب ځواکونو لیدل کیږي او دا یو ډول پر عامو خلکو بد اغیز کوي غوښتنه کوو چې د یاد کار مخنیوی وشي، څو عام وګړي وکولای شي په ډاډه زړه پارکونو کې تفریح وکړي.»
ارواپوهان هم په تفریح ځایونو کې د وسله والو ګرځېدل ناسمه چاره بولي.
اروا پوه نصیب الله ذکي اطلاعات روز ورځپاڼې سره په خبرو کې وویل، چې په تفریح ځایونو کې د وسله والو کسانو ګرځیدل عام خلک له ذهني ګډوډۍ سره مخ کوي او غوښتنه کوي چې د یادې چارې مخنیوی دې وکړي.
نصیب الله ذکي زیاته کړه: «پارکونه او نور مېله ځایونه د تفریح لپاره دي چې انسان په کې ذهني سکون ترلاسه کولای شي، خو په دغه ډول تفریحي ځایونو کې د وسله والو شتون د عامو خلکو ذهن ګډوډي او په یو ډول رواني ناروغیو یې اخته کوي، نو ښه خبره دا ده چې په تفریح ځایونو کې باید د وسله والو کسانو هغه د حکومت عسکر وي او یا شخصي وسله وال وي باید مخنیوی یې وشي.»
د یادونې ده، چې بل لور ته ننګرهار کې طالب امنیتي چارواکي د کورنیو چارو وزارت له دې پریکړې چې د طالب ځواکونه له وسلو سره تفریح ځایونو ته نه ورځي ناخبري ښیي.
