اطلاعات روز: ارزګان چې له تېرو څو کلونو راهیسې يې خلک د انټرنيټي خدمتونو څخه بې برخې ول، تازه په کې د يوې خصوصي مخابراتي شبکې له خوا د ۴ جي خدمتونه فعال شوي دي.
د ارزګان د طالبانو ولايت مقام وياند قاري محمود مدثر وايي، تر ډېرو کوښښونو وروسته دوی توانيدلي چې مخابراتي شبکې اړ کړي چې په ترينکوټ کې د ۴ جي خدمتونه فعاله کړي.
هغه وايي د مخابراتي شبکو سره په خبرو بوخت دي، ترڅو د مخابراتي شبکو دغه خدمتونه تر ولسواليو هم وغځوي.
هغه وايي په دغه ولايت کې خلک د انترنيټ په برخه کې له ګڼو ستونزو سره مخ ول او په شخصي نيټکيفي کې به يې له انترنيټ څخه استفاده کوله.
په ارزګان کې د افغان بیسيم مخابراتي شبکې مسوول هم وايي چې دوی په ترينکوټ کې د انترنيټ خدمتونه فعال کړي دي.
د دغې شبکې يو تن مسوول فضل قوي الياس وايي، د دوی خدمتونه د لینک له لارې دي او په ښه ډول کار کوي.
هغه وايي د اوس لپاره ولسواليو ته يادو خدمتونو د غځولو پلان نه لري.
په ورته مهال د ارزګان خلک بیا د انټرنيټي خدمتونو د فعاله کيدو څخه زيات خوشحاله دي اوغوښتنه کوي چې د نوی فعاله شوي انترنيټي خدمتونو کیفیت او سرعت دې ښه شي.
خلک وايي، له تيرو څو کلونو راهیسي يې د انترنيټ په نه شتون کې د زياتو ستونزو سره مخ وو او په خبره يې چې په لوړ قيمت به يې په نيټ کيفي کې انترنيټ کارولي.
ارزګان چې د هېواد په جنوب کې پروت ولايت دی، خلک يې له ډيرو اسانتياوو څخه بې برخې دي.
په دغه ولايت کې د ښوونې روزنې، روغتيايي او زياتو نورو برخو کې خلک د ستونزو سره لاس او ګريوان دي.
