اطلاعات روز: طالب چارواکي وایي، د دې مرکزونو په جوړیدو سره به روغتیایي خدمتونو ته د خلکو لاسرسی ډیر او د مور او ماشوم د مړینې کچه به ورسره راکمه شي.
د ننګرهار طالب والي دویندوی له دفتره رسنیو ته په استول شوې خبرپاڼه کې ویل شوي چې د ننګرهار مرستیال والي حاجي مدثر سره په افغانستان کې د ملګرو ملتونو د بشري چارو مسوول الکساندر بودیروز ګډه ناسته کړې ده.
خبرپاڼه کې راغلي، نوموړي ژمنه وکړه چې ملګري ملتونه به د ننګرهار ولایت په لرې پرتو سیمو کې د لومړنیو روغتیایي خدمتونو د مرکزونو په جوړولو کې مرسته وکړي او د دغه مرکزونو لپاره به ودانۍ، وسایلو او درملو په چمتوکولو او روغتیایي کارکوونکو په ګومارنه کې اسانتیاوې برابرې کړي.
نوموړي د ننګرهار له مرستیال والي غوښتنه وکړه چې د اړمنو خلکو د معلومولو لپاره د دوی کارکوونکو ته د کارکولو په زمینې برابرولو کې مرسته وکړي.
د ولایت مقام په خبرپاڼه کې راغلي چې دننګرهار مرستیال والي دملګرو ملتونو ددې اقدام دستاینې تر څنګ هغوې ته دهمکارۍ ډاډ ورکړ او زیاته یې کړه چې په دې کار سره به روغتیایی خدمتونو ته د خلکو لاسرسی زیات شي.
ها خوا دننګرهار د عامې روغتیا ریس ډاکتر امیرمحمد افتاب وایي په لرې پرتو سیموکې به دلومړنیو روغتیایی مرستو د مرکزونو په جوړولو سره نه یوازې داچې روغتیایی خدمتونو ته د خلکو لاسرسې زیات شي بلکې د مور او ماشوم د مړینې په کچه کې به کموالی راشي او له اقتصادي پلوه به هم خلک له ستونزو وژغورل شي.
د ملګروملتونو د بشري چارو اداره داسې مهال دننګرهار ولایت په لرې پرتو سیموکې د لومړنیو روغتیايي مرستو د مرکزونو د جوړولو خبر ورکوي چې نړیوالې ټولنې دافغانستان دروغتیاي سیستم دنړیدو له امله لا له وړاندې خبر داری ورکړی دی.
