اطلاعات روز: په ارزګان کې د طالبانو ښاروالۍ رياست مسوولين وايي، دغه اشر چې د بیلابیلو دولتي ادارو استازي په کې شامل دي، هدف يې خلکو ته د ښار پاک ساتلو په هدف عامه پوهاوی ورکول دي.
د ترينکوټ ښاروالۍ طالب ښاروال مولوي هنر وايي، دغه اشر يې «زموږ ښار، زموږ کور» تر عنوان لاندې پیل کړی دی چې د ښاروالۍ تر چتر لاندې د ښار ټول واټونه پاک کړي.
مولوي هنر وايي پلان لري ترڅو د ښار د ښکلا په هدف په ترينکوټ ښار کې نيالګي هم کښيږدي.
دی وايي :«نن چې موږ دغه اشر راپیل کړی دی، هدف مو خلکو ته عامه پوهاوی ورکول دي، ترڅو خلک وهڅول شي چې ښار د خپل کور په څير ګڼي او پاک ساتلو ته يې پام وکړي. له خلکو څخه غوښتنه کوو چې د ښار پاک ساتلو ته پام وکړي.»
د ارزګان د اطلاعات او فرهنګ رياست يو طالب مسوول غلام نبي الفت د دغه اشر پر مهال وويل، د ټولو ښاريانو دنده ده چې د ښار پاک ساتلو ته پام وکړي او ښار د خپل کور په څير وګڼي.
نوموړي وويل: «دغه پروګرام د ښاروالۍ، اطلاعات فرهنګ او نورو رياستو په ملتيا پیل شوی دی، ترڅو له يوې خوا ښار پاک کړو او له بل پلوه خلکو ته عامه پوهاوی ورکړو چې د ښار پاک ساتلو ته پام وکړي.»
په همدې مهال خلک هم د دغه ډول پروګرام هرکلی کوي. د ترينکوټ اوسيدونکي د ښار په پاک ساتلو کې د عامو خلکو او ښاروالۍ رياست دواړو کار مهم يادوي او زياتوي چې هر افغان ښار د خپل کور په څير ياد کړي او پاک ساتلو ته يې جدي پاملرنه وکړي.
د ترينکوټ يوه اوسيدونکي ملا جان خان وويل، دوی به د ښار پاک ساتلو ته جدي پام وکړي او ښاروالۍ رياست هم دنده لري چې وخت پر وخت ښار پاکولو ته پام وکړي.
دی وايي: «د ښار پاک ساتلو ته هم بايد خلک او هم ښاروالۍ دواړه پام وکړي. موږ عام خلک چې څومره مو په توان کې وي خپل کوښښ به وکړو خو د ښاروالۍ هم دنده ده چې خپل کار پر وخت وکړي.»
دا په داسې حال کې ده چې مخکې د ارزګان اوسيدونکو تل د ښاروالۍ پر رياست نيوکه کړې ده چې د ښار پاک ساتلو او عامه نظم رامنځته کيدو ته پام نه کوي او عام خلک غوښتنه کوي چې ښاروالۍ دې خپل مسوليت ته جدي پاملرنه وکړي.
