اطلاعات روز: په هلمند کې د هرې ورځې په تېرېدو سره د کرونا مثبتې پېښې زیاتېږې، چې روغتیایي مسوولین یې لویه ستونزه د خلکو له خوا د روغتیايي لارښوونو نه عملي کول په ګوته کوي.
په لښکرګاه کې د کرونا ۲۰ بستریز روغتون رییس ډاکتر نصرت الله صفاري نن (يکشنبه، د سلواغې په ۲۴مه) اطلاعات روز ته وویل، په دې وروستیو کې په دغه ولایت کې پر کویډ۱۹ ناروغۍ د اخته کسانو شمېر زیات شوی دی.
د ده په وینا، په تېره جنوري میاشت کې ۲۰۶ مثبتې پېښې ثبت شوې او په روانه میاشت کې هره ورځ ۱۳۰ سمپلونه اخلي، چې ۵۶ او ان تر ۶۰ پورې مثبتې ثابتېږي.
هغه وویل: «د تېر په څېر په دغه ولایت کې د کرونا مثبتې پېښې ډېرې شوې، هره ورځ په ډېره اندازه خلک پر دې وبا اخته کېږي. د اټکل له مخې ویلی شو چې ۷۰ سلنه د کرونا مثبتې پېښې ډېرې شوې دي.»
همداراز بیا د یاد روغتون امر ډاکتر عنایت الله داوري هم وایي، د ناروغانو شمېر زیات دی او په خبره یې، د ځای نشت هم بله ستره ستونزه ده.
نوموړي وویل: «د اکسېجن په برخه کې دومره ستونزې نشته، خو ځای کم دی. یانې ناروغان ډېر دي او ځای مو کم دی.»
په ورته وخت کې بیا په یاد روغتون کې ناروغان پر شته خدمتونو خوښي څرګندوي او په خبره یې، په دې وروستیو کې ناروغانو ته پر وخت رسېدنه کېږي، خو ولسوالیو ته د دغو خدمتونو غځېدو غوښتنه کوي.
هغه وویل: «اوسمهال دلته ښه خدمتونه وړاندې کېږي، موږ خوښ یو، خو تمه لرو کې لېرې پرتو ولسوالیو ته هم دا خدمتونه وغځول شي.»
د یادولو وړ ده چې کورونا ویروس نه یوازې په هلمند، بلکې په دې وروستیو کې د هېواد په نورو برخو کې هم ډېر شوی او هره ورځ ډېری کسان پرې اخته کېږي.
