اطلاعات روز: خوست کې طالبانو د موسيقۍ په نشر بنديزلګولی. د محلي رسنيو مسوولين وايي، طالبانو ترې غوښتنه کړې، چې د راډيو ګانو له لارې د شريعت خلاف نشرات و نه کړي.
واک ته د طالبانو له رسېدو څه باندې پنځه مياشتې تېريږي، د ګڼو نورو بدلونونو سربېره يو هم په رسنيو کې د موسيقۍ په نشريدو بنديز لګول دي.
طالبانو تازه په خوست ولايت کې د محلي رسنيو له مسوولينو غوښتنه کړې، چې په خپلو نشراتو کې د موسيقۍ او هغو خپرونو له وړاندې کولو ډډه وکړي، چې د اسلام خلاف دي.
په دې ولايت کې د يوې محلي راډيو د نشراتو مسؤول، چې د امنيتي ستونزو له امله يې ځان په مستعار ډول نور محمد معرفي کاوه، اطلاعات روز ته وويل، چې دوی ته د خوست ولايت د اطلاعاتو او کلتور رياست مسوولينو لومړی ځل د توصيې په ډول سپارښتنه کړې وه، چې په خپلو نشراتو کې له موسيقۍ خپرولو ډډه وکړي.
خو د هغه په وينا چې له څو ورځو ځنډ وروسته اوس په جدي ډول ورته ويل شوي، چې موسيقي او نورې هغه خپرونې نشر نه کړي، چې د شريعت خلاف دي.
تېره ورځ د خوست ولايت د اطلاعات او کلتور رياست چارواکو د ياد ولايت د محلي رسنيو له مسوولينو سره ناسته کړې وه او ورڅخه يې غوښتنه کړې وه، چې خپلې خپرونې اسلامي او د ټولنې له کلتور سره برابر وړاندې کړي.
د دغه رياست له فيسبوک پاڼې څخه په خپاره شوې خبرپاڼه کې د اطلاعات او کلتور ريس شبير احمد عثماني د رسنيو مسوولينو ته د ډاډ ترڅنګ په اسلامي او معياري خپرونو ټينګار کړی دی. اوس مهال په خوست ولايت کې د ملي راډيو او ملي ټلويزيون په ګډون ۱۸ محلي رسنۍ فعاليت لري، چې له دې ډلې يې ۱۴ راډيو ګانې او څلور محلي ټلويزيونونه شامل دي.
