اطلاعات روز: پکتیکا کې یوه ځایي سرچینه وایي، طالب پوله ساتو په دې ولایت کې له ډیورنډ فرضي کرښې را اوښتونکي پاکستاني ځواکونه نیولي دي.
دغې سرچينې چې د نوم له څرګندولو يې ډډه کوله، نن (شنبه، د مرغومې ۱۸مه) اطلاعات روز ته وويل، چې تېره ورځ د طالبانو پوله ساتي ځواکونو ډيورنډ فرضي کرښې ته نږدې د پکتيکا ولايت په ګومل ولسوالۍ کې اوو پاکستاني پوځيان نيولي، چې په خپلسري ډول افغان خاورې ته را دننه شوي و.
د پکتيکا ولايت د اطلاعاتو او کلتور ريس بلال حذيفه هم پېښه تاييدوي، خو وايي، نيول شوي کسان ۷ نه بلکې يو تن دی. د هغه په وينا تېره ورځ طالب سرحدي ځواکونو د ګومل ولسوالۍ په «اينځري» سيمه کې د پاکستاني ملېشه ځواکونو يو سرتېری هغه مهال ونيو، چې له کرښې دې غاړې ته د سون توکو راټولو لپاره راوښتی و.
د حذيفه په خبره چې شپږ نور پوځيان له موټر سره يو ځای بيرته په تېښته بريالي شوي دي.
په دې وروستيو کې د پاکستاني پوځيانو او طالب سرحدي ځواکونو ترمنځ د ډيورنډ کرښې په مختلفو سيمو کې حالت ترينګلي شوي او د راپورونو له مخې چې په ځينو سيمو کې يې پر يو بل ډزې هم کړې دي.
