اطلاعات روز: نورستان کې د طالبانو ټولګټو چارو ریاست مسوولین وایي، د کونړ-نورستان ترمنځ پر غځیدلې لارې د واورې پاکولو چارې یې پیل کړي دي.
د یاد ریاست د چارواکو په خبره په نورستان کې له تېرو څو ورځو راهیسې د واورې ورښت د نورستان- کونړ لويه لاره په څو ځایونو کې بنده کړې وه او موټرو په اسانۍ تګ راتګ نه شوای کولی.
نورستان کې د طالبانو د ټولګټو چارو رییس مولوي عبدالرحیم فاروقي اطلاعات روز ورځپاڼې ته وویل، د خلکو د ستونزو د هواري په موخه یې له واورې د دغې لارې د پاکولو چارې پيل کړي، څو موټر چلوونکو او مسافرو ته د تګ راتګ اسانتيا برابره شي.
ښاغلي فاروقي زیاته کړه: «د کونړ-نورستان ترمنځ لاره له تیرو څو ورځو راهیسې د وارو د ورښت له امله بنده وه او له همدې امله موټر چلوونکي او ولسي خلک د تګ راتګ پرمهال له زیاتو ستونزو سره مخ و، نو مونږ د دغه لارې د پاکولو چارې پیل کړي دي او لا هڅه کې یو چې دغه لاره بنده نشي او مونږ به د دغه لارو د خلاصون لپاره پوره هڅه کوو او دې برخه کې به هیڅ ډول ستونزه نه وي.»
نوموړی ډاډ ورکوي چې د واورې د ورښت پر مهال یې د نورستان د ټولو لویو لارو خلاصولو لپاره لازم چمتووالی نیولی دی.
د نورستان د ټولګټو چارو رییس همداراز وایي، له تېر حکومت څخه خراب وسایط په میراث کې ورته پاتې شوي خو دوی د دغه کار لپاره د اړوند وزارت په مالي مرسته درې ډوله وسایط چمتو کړي او د نورو وسايطو او موټرو د ترميم کارونه یې هم پیل کړي دي.
ښاغلی فاروقي زیاتوي: «د نورستان د ټولګټو چارو ریاست ته دتیر حکومت له لوري ځینې وسایط پاتې وو او دغه وسایط زیاتره له کاره لویدلي و خو مونږ دغه وسایط ځینې بیا ترمیم کړل او هدف مو دا و، چې له دغه وسایطو په ګټې اخیستنې د نورستان لویه لاره د وارو پرمهال خلاصې کړو او خلکو ته لازمې اسانتیاوې برابرې کړو، خو بیا هم مونږ نورستان کې دواورو پرمهال د لارو د خلاصون لپاره لازم چمتوالی لرو.»
په همدې حال کې نورستانيان د ژمي پر مهال د واورو وریدو له امله د لارو بندېدو ته اندېښمن دي.
د نورستان ولايت اوسېدونکی رفیع الله نورستاني اطلاعات روز ورځپاڼې سره په خبرو کې وویل، وېره لري، که چېرې د واورو پر مهال يې لارې خلاصې نه شي، نو د خوراکي توکو او درملو له کمښت سره به مخ شي.
رفیع الله نورستانی زیاتوي: «د نورستان-کونړ ترمنځ لاره چې هر کال پرې د ژمي پرمهال واورې کیږي نو دغه لاره بندیږي او که حکومت په دې برخه کې اماده ګي ونه لري او یا دغه لاره خلاصه نه کړي، نو د نورستان اوسیدونکي به له سختو ستونزو سره مخ شي، ځکه که لاره بنده وي نو بیا نورستان ته نه خوراکي او نه درمل رسول کیږي، له حکومت غوښتنه کوو، چې د ژمي پرمهال دې نورستان ته ځانګړی پام وکړي.»
نورستان میشتي وایي، د واورې د ورښت پر مهال پر دې لار د موټرو د چپه کېدو ګواښ زيات وي خو که همداسې پر وخت لارې پاکې شي نو ستونزې نه رامنځته کېږي.
نورستان د هیواد یو له هغه ولایتونو څخه دی چې ژمی په کې د واورې ورښت زيات وي او له همدې امله یې ډېر مهال لارې بندېږي.
