اطلاعات روز: خوست کې د طالبانو امنیتي چارواکي وایي، له تیرو څو ورځو راهیسې یې د دې ولایت په بیلابیلو سیمو کې د غلا او نشه یي توکو د پلور په تور ۲۴ کسان نیولي، ورسره یوه اندازه نشه یي مواد هم د نظامي کسانو لاسته ورغلي دي.
خوست کې د طالبانو امنيه قوماندانۍ د جنايي جرمونو پر وړاندې د مبارزې مدير صابر صابري وويل، چې په نيول شويو کسانو کې ۹ تنه د نشه يي توکو د کاروبار او ۱۴ نور يې هغه مشهور غله هم شامل دي، چې انسان تښتونې او نورو جرمونو کې يې لاس درلود.
نوموړي وويل: «کوم کسان چې تاسو دلته وینئ پدې کې ۱۴ کسان مشهور غله دي او پاتې نور ۹ تنه یې د نشه يي توکو خرڅوونکي دي، دوی ټولو په خپلو جرمونو اعتراف هم کړی، دا زموږ د ځيرکو مجاهدینو له لوري نیول شوي دي، موږ ولس ته ډآډ ورکوو چې د نشه یي موادو پروړاندې مو کلکه مبارزه شروع کړې ده.»
په همدې حال کې بيا د خوست امنیه قومندان محبوب شاه قانت خلکو ته ډاډ ورکړ، چې د هغو اشخاصو په وړاندې به جدي مبارزه کوي، چې سيمه کې د خلکو ژوند ته ګواښ پېښوي.
نوموړي وويل: «د تورو ښیښو موټر بغیر له مسولو او دولتي خلکو څخه، نور که له هرچا سره ګیر شول، بیا د شکایت حق نلري، موږ ورته را روانه چهارشنبه ټاکلې چې له هغې وروسته که څوک ونیول شول، د جرم سزا به خامخا ویني، په غیر قانوني ډول د وسلو ګرځول هم منع دي.»
دا په داسې حال کې ده، چې په دې وروستيو کې په خوست ولايت کې د نشه يي توکو د پير او پلور او همدارنګه د جنايي پېښو کچې لوړېدو باندې خلکو اندېښنه څرګنده کړې وه او له مسوولو امنيتي ادارو يې د مخنيوي غوښتنه کوله.
