اطلاعات روز: د کندهار کتلوي معافیت په آمریت کي د شري ناروغۍ د مخنیوي په موخه د واکسین لس ورځنی کمپاین دوو ماشومانو ته په ورکولو سره رسماً پيل شو.
دغه کمپاین نن (شنبه، ۱۳ د لېندۍ) پیل شو. د کندهار عامي روغتیا ریاست مرستیال ډاکټر موسی جان سلطاني وویل، د شري ناروغۍ د مخنیوي کمپاین د هیواد د پنځو ولایتونو غور، غزني، پکتیکا، بلخ او هلمند ترڅنګ په کندهار کي هم په دې موخه پيل سو، ترڅو د شري ناروغۍ مخنیوی په بشپړه توګه په کندهار او ټولو ولسوالیو کې وسي.
نوموړي په خپلو خبرو کې پر ټولو هیوادوالو غږ وکړ، ترڅو د شري ناروغۍ د مخنیوي په موخه دې لس ورځني کمپاین کي ورسره بشپړه همکاري وکړي.
په کندهار کې د واکسین د کتلوي معافیت آمر ډاکټر حزبالله فطرت په خپلو خبرو کې د شري ناروغۍ یوه وژونکې ناروغي یاده کړه او په خپلو خبرو کي یې وویل، په کندهار کي د شري ناروغۍ د زیاتو پيښو د ثبتېدو په اساس یې د کندهار عامي روغتیا ریاست په همکاري هڅه وکړه، ترڅو کندهار کي د شري ناروغۍ د مخنیوي په موخه د واکسین لګولو یاد کمپاین ترتیب کړي.
ډاکټر حزبالله فطرت وویل، د شري ناروغۍ مخنیوي په موخه د واکسین لګولو په دې لس ورځني کمپاین کي به د کندهار ښار ترڅنګ په ټولو ولسوالیو کي دوه لکه، پنځه اویا زره، اته سوه او اتو، هغو ماشومانو ته د شري ناروغۍ واکسین ولګول سي، چي عمرونه یې له نهو میاشتو بیا تر پنځه کلنۍ پورې وي او په خپلو خبرو کي یې وویل، د دې واکسین لګولو ترڅنګ د پولیو ضد د دوو څاڅکو واکسین کمپاین هم عملاً تطبیقوي.
فطرت وویل، دا کمپاین به په ښار او ولسوالیو کي د ۲۶۸ مسلکي ټیمونو په مټ تطبیق کړي او په خپلو خبرو کي یې وویل، دې کمپاین کي یې په ټولیزه توګه تر دولس سوه زیاتو کسانو ته د کار زمینه برابره کړې.
وروستیو کي د بېړني مراقبت څانګي مسئول ډاکټر عبدالقیوم پخلا هم شرې ناروغي یوه وژونکې ناروغي یاده کړه او په خپلو خبرو کي یې پر ټولو عُلماوو، هیوادوالو، نظامي او ملکي ادارو او ټولو مدني فعالانو ږغ وکړ، ترڅو د شري ناروغي د مخنیوي په موخه د واکسین لګولو ددې کمپاین ترڅنګ د پولیو ضد واکسین په تطبیق کي هم خپل مهم رول ادا کړي.
