ننګرهار ولایت کې د ښځو ریاست مسوولین وایي، په دې ولایت کې سږ کال د ښځو پر وړاندې د تاوتریخوالي ۲۲۰ قضیې ثبت شوي دي.
د ښځو چارو رییسې فتانې عزیز نن ( پنجشنبه، ۶ لیندۍ) اطلاعات روز ورځپاڼې سره په خبرو کې وویل، چې سږ کال د ښځو پر وړاندې د تاوتریخوالي په پېښو کې ۱۶ سلنه زیاتوالی راغلی دی.
اغلې فتانې زیاته کړه، چې روان کال یې په جلال اباد ښار او ولسوالیو کې د ښځو پر وړاندې د تاوتریخوالي ۲۲۰ قضیې یې ثبت کړي دي، چې په ثبت شوو پېښو کې وهل ډبول، تاوتريخوالی، په جبري ګوښه توب او داسې نور موارد شامل دي.
فتانې زیاته کړه: «سږکال د ښځو پر وړاندې تاوتریخوالی زیات شوی، چې زیاتره یې د کورني تاوتریخوالي دي او مونږ سره ۲۲۰ قضیې ثبت شوي دي او دا ارقام تیر کال ته شپاړلس سلنه زیاتوالی ښیي.»
خو دا چې ولې هر کال د ښځو پر وړاندې د تاوتریخوالي په پېښو کې د کموالي پر ځای زیاتوالی راځي.
ښځينه فعالې مسکا زړه سواندې اطلاعات روز ته د دغو قضیو د زیاتیدا اصلي لاملونه فقر، بې روزګاري، کلتوري محدودیتونه او نور یاد کړل.
هغې زیاته کړه: «اصلي لامل چې د ښځو پر وړاندې د تاوتریخوالي د زیاتیدو لامل شوی، هغه په افغاني ټولنه کې د ښځو له حقوقو ناخبري، بې سوادي او بې وزلي دي، چې له امله یې مونږ له ستونزو سره مخ یو.»
بل لور ته ښځينه فعالې وګمې بارکزۍ اطلاعات روز سره په خبرو کې د ښځو د ملاتړ په برخه کې په اړونده ادارو نیوکه وکړه، چې هر کال یې پر وړاندې د تاوتریخوالي پېښې ثبتیږي، خو ګڼې یې د مسوولو ادارو د نه پاملرنې له امله پر وخت نه څیړل کیږي.
بارکزۍ زیاتوي: «هر پروګرام چې د ښځو په نوم جوړیږي نو دا به یوه پروژه وي او ګډونوال یې زیاتره د رییسانو او د ادارې د مسوولینو خپلوان وي، یعنې د ښځو غږ په سم ډول تر اړونده ادارو نه رسیږي.»
سره له دې چې په دې وروستیو کې د ښځو چارو ریاست له لوري په جلال اباد ښار او ولسوالیو کې د ښځو په برخه کې د عامه پوهاوي او نورو برخو کې ډیر راپورونه خپریږي، خو بیا هم په ننګرهار کې د ښځو د تاوتریخوالي په پېښو کې د تیر کال په پرتله زیاتوالی راغلی.
