اطلاعات روز: پاکستان کې د افغانستان سفارت وایي، اسلاماباد هوکړه کړې چې د افغانستان د هوایي چلند کارکوونکو ته د اطفایې، خوندیتابه، ټرافیکو کنټرول، هوا پېژندنې او د هوایي ډګر مدیریت برخو کې لازمې مسلکي زده کړې ورکړي.
پاکستان کې د افغانستان سفارت نن (سهشنبه، ۲۵ د لړم) پر خپلې فیسبوکپاڼې یوې خبرپاڼې په خپرولو سره ویلي چې دغه هوکړه د طالبانو بهرنیو چارو د وزیر امیرخان متقي په مشرۍ پاکستان ته د تلونکي طالب پلاوي په سفر کې پاکستاني لوري سره شوې ده.
خبرپاڼه وایي، په دې لیدنه کې پاکستاني لوري سره د هوایي چلند برخه کې ځینې نورې هوکړې هم شوې دي. د خبرپاڼې په وینا په هوکړه کې یو دا هم ده چې د اسلام اباد او کابل ترمنځ هر لوری په اونې کی لس پروازه عملي کولی شي چی له دې جملې دوه الوتنې په لویو الوتکو او پاتې اته الوتنې په وړو الوتکو کی عملي کیږي.
خبرپاڼه وایي: «د سیټونو شمیر پخوا د دواړو لوریو ۱۰۰۰ یو زرو پورې محدوده شوې وه خو اوس پنځه سوه سیټه پرې زیات شول چې جمله تر پنځلس سوه سیټه په اونې کې مسافر انتقالولای شي.»
افغان سفارت وایي، پاکستانی لوری د پاکستان له هر هوایي ډګره چه وغواړي د افغانستان د کابل، مزار شريف او کندهار هوایي ډګرونو ته الوتنې کولی شي. له دې خوا بیا د افغانستان لوری د هېواد له هر هوایی ډګره چه وغواړي د پاکستان اسلام اباد، پیښور او کویټې ډګرونو ته الوتنې کولی شي .
خو خبرپاڼه زیاتوي چې د افغانستان لوری غواړي په نږدې راتلونکي کې د کویټې پر ځای د کراچۍ هوایي ډګر ته د الوتنو اجازه ورکړل شي.
