اطلاعات روز: د ننګرهار ولایتي چارواکي په دې ولایت کې د تېرې ورځې د چاودنې په تور د درې تنو د نیول کیدو خبر ورکوي.
د ننګرهار ولایت د رسنیو له دفتره په خپره شوې خبرپاڼه کې راغلي، چې طالب ځواکونو د ننګرهار سپين غر ولسوالۍ د «تریلي» سيمې په جامع جومات کې د چاودنې درې تنه عاملين نیولي دي.
سرچینه وایي، د دې پېښې په اړه نورې څېړنې روانې دي او ډير ژر به د قانون له مخې اجرات تر سره شي.
سرچینې د نیول شویو کسانو په تړاو نور څه نه دي ویلي، چې څوک او چا پورې تړاو لري.
تېره ورځ (جمعه، ۲۱ د لړم) د ننګرهار ولايت سپين غر ولسوالۍ «تريلي» سیمې په يو جومات کې د جمعې لمانځه پر مهال د شوې چاودنې، چې له امله يې شاوخوا ۱۵ تنه ټپيان شول، چې په کې د سپین غر ولسوالۍ لپاره د طالبانو ملکي ولسوال ملا عبدالصمد هم شامل وو.
خو ای ایف پي خبري اژانس بیا ننګرهار کې د روغتیایي چارواکو له خولې ویلي چې په دې چاودنه کې درې تنه وژل شوي او ۱۵ نور ټپیان دي.
د یادونې ده چې دا پېښه د جمعې د لمانځه پرمهال به جومات کې د ځای پرځای شویو چاودېدونکو توکو له امله رامنځته شوه.
د پېښې مسوولیت تر اوسه چا نه دی منلی، خو له دې وړاندې د یو شمېر پېښو مسوولیت داعش ډلې منلی وو.
