اطلاعات روز: د ننګرهار ولایتي چارواکو پرېکړه کړې چې له دې وروسته ریکشاچلوونکي نه شي کولی چې وسله وال ولېږدوي.
د ننګرهار والي وياند قاري قاضي ملا عادل نن (یک شنبه۱۶ د لړم) اطلاعات روز ورځپاڼې ته وویل، د دې ولايت والي مولوي محمد داود مزمل د سپارښتنې له مخې له دې وروسته ريکشا چلوونکي نه شي کولی چې وسله وال کسان ولېږدوي.
د هغه په وینا چې سرغړونکو سره به سخت قانوني چلند وشي.
نوموړی وايي طالبانو ته هم لارښوونه شوې چې په ريکشاو کې له مسلح ګرځيدو څخه ډډه وکړي.
هغه زياتوي د ننګرهار والي پر ښاريانو هم غږ کړی چې په ريکشاو کې د وسله والو کسانو په لېدلو سره نږدې امنيتي مسولينو ته خبر ورکړي.
نوموړی زیاتوي: «د ننګرهار والي ټولو ریکشا چلوونکو ته سپارښتنه کړې چې وسله وال کسان انتقال نه کړي او نه هم طالبان حق لري، چې له ریکشا څخه د تګ راتګ لپاره استفاده وکړي د سرغړونکو سره به یې قانوني چلند وشي او زمونږ هدف د امنیت ټینګښت دی.»
په همدې حال کې د جلال اباد ښاریان د ولایتی ادارې د شوې پریکړې هرکلی کوي او وایي، د یادې پریکړې په تطبیق سره به تر ډیره د امنیتي او په خاص ډول د هدفي وژنو مخنیوی وشي.
چارواکي داسې مهال یاده بریکړه کوي چې په دې وروستیو کې جلال اباد ښار او ولسوالیو کې هدفي وژنو او بمي چاودنو زور اخیستی.
