اطلاعات روز: پاکستان کې د «تحریک لبیک» زرګونه پلویانو لاریون کړی چې لاریونوالو سره په نښته کې دوه پولیس وژل شوي او ګڼ نور ټپيان شوي دي.
وي او اې ډېوې راډیو د راپور له مخې دغه لاریون پرون (جمعه، ۳۰ د تلې) د پاکستان په لاهور ښار کې شوی دی. دا لاریون چې د «تحریک لبیک» له خوا شوی موخه یې د دې تحریک د ویاند صدام بخاري په وینا، د دې ډلې مشر سعد حسین رضوي ازادېدل او له پاکستانه د فرانسې سفیر وېستل دي.
دوی پاکستان کې د فرانسې سفیر وېستلو غوښتنه، د اسلام پیغمبر حضرت محمد (ص) ته د یو فرانسوي له خوا د سپکاوي له امله کوي.
دا لاریون د «تحریک لبیک» زرګونه پلویانو له لاهوره پیل او د پلازمېنې اسلاماباد پر لور روان کړی و چې پر لاره پاکستاني پولیسو یې مخه ډب کړه. د راپور له مخې چې پولیسو سړکونه په کانټینرونو بندې کړې وې. دغهراز د دې هېواد نورو ښارونو ځینې سړکونه هم د دې لاریونونو مخنیوي لپاره تړل شوي دي.
وي او اې وایي، چې په همدې مهال د پولیسو او لاریونوالو ترمنځ نښته رامنځته شوې او پایله کې یې دوه پولیس وژل شوي او ګڼ نور ټپيان شوي دي. په ورته مهال بیا پولیسو د دې ډلې په سلګونه پلویان نیولي دي.
د پنجاب اعلا وزير عثمان بزدار ویلي قانون په خپلو لاسونو کې اخیستوونکو په ضد به سخت ګامونه اخیستل کېږي.
اخوا د ټى ايل پى مرکزى شورا په يو بيان کې ويلې چې اوس حکومت سره په دې شرط خبرې کوي چې لاهور کې بندي د دې ډلې مشر سعد رضوي خوشې کړي او لاريون ته راوستل شي.
د پاکستان د کورنیو چارو مرکزي وزیر شیخ رشید احمد ويلي د تحریک لبېک په غوښتنه حکومت د فرانسې سفیر له هیواده نه شي ویستلی.
وي او اې وایي، شېخ رشید د پنجشنبې په ورځ وویل له هېواده د فرانسې د سفیر ویستلو مانا به دا وي چې پاکستان د اروپایي اتحادیې څخه بهر شو او پاکستان داسې نه شي کولی.
تحریک لبېک سږکال د اپریل په میاشت کې پاکستان کې له تشدده ډک احتجاجونه کړي چې د ځینو شمېرو له مخې په دې لاریونونو کې شپږ پاکستاني پولیس وژل شوي او له ۸۰۰ زیات نور ژوبل شوي دي.
د دغو احتجاجونواو مرګ ژوبلې په نتيجه کې حکومث تحریک لبېک «غېرقانونه» تنظیم اعلان کړی دی.
