اطلاعات روز: د طالبانو بهرنیو چارو وزارت ویلي، پر تورخم یوازې باروړنکې لارۍ او هغوی چې پاسپورټ او ویزه ولري، اوښتی شي.
د طالبانو ویاند او د اطلاعات او کلتور وزارت مرستیال ذبیحالله مجاهد پرون (جمعه، ۳۰ د تلې) پر خپل ټوېټر د بهرنیو چارو وزارت ویاند عبدالقهار بلخي له خولې ویلي، چې له پاسپورټ او ویزې پرته وګړي دې پر تورخم د اووښتو هڅه نه کوي.
ښاغلي مجاهد د ښاغلي بلخي له خولې لیکلي: «نو څوک چې پاسپورت او ویزه ونه لري هغوی که لویان وي که ماشومان د خیبر پښتونخوا لوري ته د اوښتو اجازه نه ورکول کیږي او بیرته به را ګرځي کوم کسان چي تورخم ته تللی هم وي او یاد اسناد ونه لري بیرته دي خپلو کورونو ته ولاړشي.»
د طالبانو دې ویاند همدارنګه لیکلي چې هڅه کوي په دې برخه کې نورې اسانتیاوې هم رامنځته کړي.
تورخم دروزاه تېره پنجشنبه پرانیستل شوه خو پرون جمعه بیا له لږ ځنډ تړل کېدو وروسته بیا خلاصه شوه.
د تورخم کمیسارۍ مسوولینو نن (شنبه، ۱ د لړم) اطلاعات روز ورځپاڼې ته وویل، د تورخم دروازه تیره ورځ د زیات بیرو بار او د خلکو د بې نظمۍ له امله د لنډ وخت لپاره تړل شوې وه، خو نن بیرته د مسافر د تګ راتګ پرمخ خلاصه شوه.
د تورخم کمیسارۍ د مسولینو په خبره چې د تورخم پر دروازه ټول هغه افغانان چې پر پاسپورټ یا هم انلاین ترلاسه کړې ویزه ولري، پاکستان ته اوښتلی شي.
هلته اوس په زرګونه کسان ولاړ دي څو له ډیورنډ فرضي کرښې هاغاړې ته واوړي.
د تورخم دروزاه وروسته تر هغې د وېزه لرونکو لپاره پرانیستل کېږي، چې له تېرو څو میاشتو راهیسې پاکستان ته تلونکي افغانان له سختو ستونزو سره لاس او ګرېوان وو.
عام افغانان هیله لري چې دا پوله دې د هر ډول تګ راتګ لپاره پرانیستې وي.
