اطلاعات روز: طالب لوړپوړي چارواکي ازبکستان هېواد ته له یو ورځني سفر وروسته بېرته کابل ته راګرځېدلي.
د طالبانو ویاند او د اطلاعاتو او کتلور وزارت مرستیال ذبیحالله مجاهد پرون ناوخته (شنبه، ۲۴ د تلې) پر خپل ټوېټر د دې سفر په اړه یوه اعلامیه خپره کړې او لیکلي یې دي چې طالب لوړپوړو چارواکو په دې سفر کې د ازبکستان د لومړي وزیر مرستیال عمرزاکوف سره لیدلي او غږېدلي.
نوموړي لیکلي چې ازبکستان ته د رییس الوزار د مرستیال مولوي عبدالسلام حنفي په مشرۍ د لوړپوړي پلاوي سفر کې د سوداګرۍ، اقتصاد، عامې روغتيا، هوانوردۍ، لوړو زده کړو وزيران، د چارو ادارې لوی رییس، د بهرنيو چارو وزارت، ملي دفاع وزارت، امنيتي سکتور او د ملي سوداګرو استازي شامل ول.
اعلامیه وایي، په دې سفر کې د دوه اړخیزې سوداګرۍ په پراختیا، روغتیا، برښنا، د اورګاډي پر پټلۍ، ټرانزیټ کې پر اسانتیاوو او نورو موضوعاتو خبرې اترې وشوې.
اعلامیه کې راغلي: «له ازبکستاني لوري سره د دوه اړخيزې سوداګرۍ په پراختيا، په ځانګړې توګه په راتلونکي ژمي کې سونتوکو او لومړنيو اړتياوو کې زياتوالی، افغان سوداګرو لپاره په ټرانزيټ کې اسانتياوې، روغتيايي سکتور کې همکاري، د سرخان-پلخمري ۵۰۰ کيلو ولټ برېښنا مزي او مزارشريف-کابل-پېښور رېل پټلۍ په باب هر اړخيزې خبرې ترسره کړې.»
طالبان وایي، په دې کتنه کې د دواړوغاړو تخنيکي ټيمونو د دواړو هېوادونو د لیوالتیا وړ مسايلو پر جزياتو تفصيلي خبرې وکړې او د دواړو مشرانو په لارښوونه، د دواړو لوريو ترمنځ په ګڼو برخو کې ګډ کاري ټيمونه رامنځته شول.
اعلامیه وایي، دغه کاري ټيمونه به پر اړوندو موضوعاتو خبرې کوي او خپلو-خپلو مشرانو ته به د راتلونکو ګامونو لپاره لارنقشې وړاندې کوي.
اعلامیه زیاتوي: «د مشرانو له لارښوونې سره سم، راتلونکو لسو ورځو کې به لارنقشې بشپړېږي او د دواړو غاړو مشرانو ته به د پرېکړو لپاره وړاندې کېږي.»
د طالبانو اعلامیه همداراز وایي، چې د مذاکراتو پای کې دواړو لوریو هيله څرګنده کړه چې ګډ کاري ټيمونه اړوندې چارې ژر بشپړې کړي او عملي ګامونه پورته کړي.
