اطلاعات روز: د اطلاعات روز ورځپاڼې دوه خبریالان تقي دریابي او نعمتالله نقدي د طالبانو له لوري تر نیولو وروسته، ډېر سخت وهل ډبول شوي دي.
د دې دواړو خبریالانو پر تن د کېبل او لښتې نښې ښکاري. دا خبریالان وایي چې هر یو یې بېلو خونو ته یوړل او هلته یې په کېبل وهلو پیل وکړ.
تقي دریابي او نعمتالله نقدي درملنې لپاره روغتون ته یوړل شول.
د اطلاعات روز دغه خبریالان چې نن سهار (چهارشنبه، ۱۷ د وږي) د کابل لویدیځ څلورمې کارتې سیمه کې د مېرمنو د یو لاریون پوښښ لپاره ورغلي ول، تر نیولو وروسته لومړی طالبانو ځان سره وړي او بیا یې وهلي دي.
لاریونوالو د طالبانو په اعلانشوې کابینې نیوکې کولي چې ګواکې ښځو ته په کې ځای نه دی ورکړل شوی.
د دې خبریالانو د نیولو له خبر وروسته د اطلاعات روز سرلیکوال او دوه نور خبریالان یې خبر اخیستو او د ازادېدو په هیله سیمې ته ورغلي ول، چې طالبانو دا درېواړه هم ونیول، خو له شاوخوا څلور ساعتونو وروسته یې خوندي بېرته خوشې کړل.
تراوسه لا څرګنده نه ده چې طالبانو ولې دا خبریالان ونیول او تر وهلو ډبولو لاندې یې ونیول.
طالبانو تیره ورځ هم شاوخوا ۱۴ خبریالان چې د کابل لاریونونو ته یې پوښښ ورکاوه، ونیول او له څو ګړیو وروسته یې بېرته خوشې کړل. په هغوی کې هم ځینې خبریالان ټپیان شوي ول.
