اطلاعات روز: طالبانو د پکتیکا ولایت د مرکز ښرنې – ارګون تر منځ د سروضې ولسوالۍ اړوند د پړاو سیمه کې د «پړاو» په نوم د هغه پله د بيرته رغېدو چارې پيل کړې، چې دوه مياشتې وړاندې په بمونو الوزول شوی و.
د پکتيکا والي محمد عيسی یاسین جوړو شويو مراسمو کې وويل، چې د دې پله د جوړېدو لپاره جوديجه ځانګړې شوې او په خبره يې چې د پخوا په څېر به بيرته په هماغه ډول ورغول شي.
نوموړی وايي: «مونږ نن ورځ د پړاو پُل چې ويجاړ شوی و، د بيرته رغولو چارې پيل کړې، د ا.ا.ا مجاهدينو دې پله ته ټول مصارف په نظر کې نيولي او انشاالله چې د ولس له غوښتنې سره سم به په هماغه ډول بيرته ورغول شي.»
ښاغلي ياسين زياته کړه، چې د ا.ا.ا ولس ته د ډاډمن امنيت راوستلو ترڅنګ په بيا رغونه کې هم ښه خدمات وړاندې کړي او هغه برخې چې د جګړو له امله ویجاړې شوې هم بيرته ورغوي.
هغه وويل: «مونږ په ټوله مانا ژمن يو، چې ولس ته د ارامه او سوکاله چاپيريال ترڅنګ په رغونې برخه کې هم کوټلي ګامونه واخلو، هغه ملکي او دولتي ودانۍ چې د جګړو له امله زيانمنې شوې، بيرته ورغوي.»
د سروضې ولسوالۍ اوسېدونکي د طالبانو له دې اقدام خوښ دي او وايي، د پله له ويجاړېدو وروسته د سروضې ولسوالۍ په ګډون د ارګون او ځينو نورو سيمو اوسېدونکي له ګڼو ستونزو سره مخ و.
د يادې ولسوالۍ قومي مشر ملک وزير اطلاعات روز ته وويل، چې دوی د ا.ا.ا له ولايتي چارواکو د نورو رغنيزو پروژو د پلې کېدو غوښتنه هم کوي.
هغه وايي: «مونږ د دې پله په بيا جوړېدو خوښ يو، چې طالبانو يې نن د کار پيل وکړ، ځکه په همدې لاره د ارګون، سروضې او ځينو نورو سيمو هره ورځ سلګونه موټرې تګ-راتګ کوي، هيله او غوښتنه مو دا ده، چې ولس ته نور هم د بيا رغونې برخه کې پام وشي او ستونزو ته يې په وخت رسيده ګي وشي.»
دوه مياشتې وړاندې د افغان ځواکونو او وسله والو طالبانو ترمنځ د جګړو له شدت وروسته د پړاو پله ته چاودنه ورکړل شوه، چې په هماغه وخت کې يې طالبانو په پېښه کې لاس لرل په کلکه رد کړي و، د پکتيکا ولايت په ځينو نورو ولسواليو کې هم ځينې لوی او واړه پلونه د جګړو له امله ويجاړ شوي، چې ځايي خلک يې له سختو ستونزو سره مخ کړي دي.
