اطلاعات روز: فوربز مجلې راپور ورکړی چې یوازې جون میاشت کې د دولتي ځواکونو شاوخوا ۷۰۰ لارۍ، هاموې او دغه راز لسګونه زرهې وسایط او توپخانې د طالبانو لاس ته لوېدلي دي.
دا شمېرې د یوې پرانیستې سرچینې له یو څېړنیز راپوره چې اوریکس وبلاګ کې د جوست اولیمانز له لوري خپور شوی، لاس ته راغلي. دې خبریال طالبانو ډلې ته د دولتي ځواکونو د نظامي سالمو او له کاره لوېدلي تجهیزاتو انځورونه او وېډیوګانې چې دې ډلې ټولنیزو رسنیو کې خپاره کړي، ارزولي دي.
دې وبلاګ له دې وړاندې په ۲۰۲۰ کال کې هم د اذربایجان او ارمنستان ترمنځ د قره باغ جګړه کې د له لاسه تللیو تجهیزاتو په اړه کره او ډېر جزیات خپاره کړي ول.
د دې وبلاګ ارزونه ښيي چې د جون ۳۰مې تر مازدیګره ۷۱۵ سپکې لېږدوونکې وسیلې د ۶۵ له کاره لوېدلیو وسایطو سره، د طالبانو لاس ته ورغلي دي. د فوربز راپور کې راغلي چې شونې ده د دولتي ځواکونو زیات تجهیزات او وسایل د طالبانو لاس ته ورغلي وي. خو په عکسونو یا فیلمونو کې یې د نه ثبت له امله حساب کې نه دي راغلي.
په ۲۰۱۸ کال کې افغان دولتي ځواکونو د ۱۳ زره هاموې موټرو په ګډون له ۲۶ زره لېږدوونکو او جنګي وسایطو سره عملیات کول. په داسې حال کې چې میتزر لیکي چې ټوله کې ۲۵۰۰۰ هاموې تر ۲۰۲۱ کال پورې افغانستان ته لېږدول شوي دي. د سختې جګړې جریان کې د افغانستان دولت په معمول توګه یوه اونۍ کې ۱۰۰ هاموې ګاډي له لاسه ورکول.
افغانستان کې جګړه له مې میاشتې را په دېخوا سخته شوې ده. طالبانو ډلې په دې موده کې په بې مخینې توګه د ولسوالیو پر مرکزونو سخت بریدونه ترسره کړي دي. دې ډلې په دې موده کې شاوخوا ۸۰ ولسوالۍ نیولي دي. ځینې دا ولسوالۍ د امنیتي او دفاعي ځواکونو له لوري د پاڅونوالو په ملاتړ له طالبانو بېرته نیولي دي.
