اطلاعات روز: د ننګرهار په هسکې مېنې او پچیراګام ولسوالیو کې له تېرې شپې راهیسې د افغان ځواکونو او وسله والو طالبانو ترمنځ جګړې پیل شوي، چې دواړو لورو ته په کې مرګ ژوبله اوښتې ده.
د هسکې مېنې روغتیایي مسوولینو اطلاعات روز ورځپاڼې ته ویلي، چې د دې ولسوالۍ په تړلې کنډو سیمه کې د افغان ځواکونو پر پوستو له شوې او روانې جګړې له امله ورته ۱۶ تنه ټپیان وروړل شوي، چې یو یې ملکي او ۱۵ نور یې محلي او نور افغان ځواکونه دي.
په همدې حال کې د ننګرهار د ولایتي شورا غړي اجمل عمر اطلاعات روز ورځپاڼې سره په خبرو کې وویل، چې د هسکې مېنې او پچیراګام ولسوالیو په نښتو کې افغان ځواکونو او وسله والو طالبانو ته درنه مرګ ژوبله اوښتې، خو کره شمېر یې لا هم مالوم نه دی.
د نوموړي په خبره په هسکه مېنه او پچیراګام ولسوالو کې له تیرې شپې راهیسې تر اوسه ۱۰ امنیتي پوستې وسله والو طالبانو سقوط کړي، خو جګړه لا دوام لري.
اجمل عمر زیاتوي:«په پچیراګام ولسوالۍ کې ۷ پوستې وسله والو طالبانو نیولي دي او همدارنګه په هسکې مېنې ولسوالۍ کې بیا درې پوستې وسله والو طالبانو سقوط کړي دي اوس هم جنګ روان دی او دواړو لورو ته درنه مرګ ژوبله اښتې خو کره مالومات یې نه کیږي.»
که څه هم ځایي جکومتي سرچینو لا په دې اړه څه نه دي ویلي، خو د وسله والو طالبانو ویاند ذبیح الله مجاهد بیا د یوې خبرپاڼې په خپرولو سره ادعا کړې، چې د هسکې مینې او پچیراګام ولسوالیو کې یې ۱۶ امنیتي پوستې نیولي دي او همداراز یې په هسکه مېنه کې د دریو پوستو د نیولو، ۲۵ افغان ځواکونو د وژلو، ګڼو ټپي کېدو او د ۳۰ میله سپکو او درنو وسلو د ترلاسه کولو او همداشان په پچیراګام ولسوالۍ کې د ۱۳ پوستو د نیولو، ګڼو افغان ځواکونو د وژلو او ۲۰ تنو افغان ځواکونو د نیولو ادعا کړې ده.
هڅه مو وکړه په دې اړه د ولایتي او ځایي چارواکو نظر واخلو خو بریالي نه شو.
د ننګرهار اچین، سپین غر، هسکه مېنه او پچیراګام هغه ولسوالي دي، چې له تېرو دوو اونیو راهیسې په کې د افغان ځواکونو او وسله والو طالبانو د نښتو او دواړو لوریو ته د مرګ ژوبلې خبرونه ورکول کیږي.
