اطلاعات روز: د بې پولې خبریالانو سازمان افغانستان کې د خبریالانو پر وړاندې د جنایتونو څېړنې او ارزونې لپاره، د جرمونو نړیوالې محکمه کې شکایت کړی دی.
بې پولې خبریالانو دغه شکایت پاڼه تېره ورځ (سه شنبه، ۱۱ د غبرګولي) د جرمونو نړیوالې محکمې څارنوالې فاتو بنسوډا ته لېږلی او له دې محکمې یې غوښتي چې افغانستان کې د خبریالانو پر وړاندې د تېر یوه کال جنایتونه وارزوي.
د بې پولې خبریالانو سازمان ویلي، چې تېر لمریز کال افغانستان کې ۱۱ خبریالان او د رسنیو همکاران وژل شوي دي.
دغه بنسټ زیاته کړې، چې د جرمونو نړیوالې محکمې د اساس لیک ۱۵مې مادې په استناد، د دې خبریالانو او رسنیزو همکارانو دوسیې د جنګي جنایت تور څېړنې او ارزونې لپاره د جرمونو نړیوالې محکمې ته وړاندې شوې دي.
د بې پولې خبریالانو سازمان اعلامیه چې نن (چهارشنبه، ۱۲ د غبرګولي) خپره شوې راغلي چې د تېر کال اوږدو کې جلال اباد کې د انعکاس ټلوېزیون درې کارمنان، د «صدای غور» راډیو مدیر مسوول بسم الله عادل ایماق، هلمند کې د ازادۍ راډیو خبریال الیاس داعي، جلال اباد کې د انعکاس ټلوېزیون ویانده ملاله میوند، غزني کې د الجزیرې ټلوېزیون او اسوشیټدپرس اژانس خبریال رحمت الله نېکزاد او کابل کې د خورشید خصوصي ټلوېزیون خبریال زمیر امیري او د تخنیک برخې کارمن شفیق الله ذبېح وژل شوي دي.
د دې اعلامیې له مخې، د وسله والو نښتو، د امنیتي حالت خرابېدو او د مدني ټولنې پر وړاندې د تاوتریخوالي زیاتېدو سره هم مهاله، ټول ۱۱ خبریالان او د رسنیو همکاران، د رسنیزو فعالیتونو له امله په موخیزه توګه وژل شوي دي.
بې پولې خبریالانو ویلي، د منلو وړ دلیلونه لاس کې لري چې ښیي، وسله والې ډلې او په لومړۍ کرښه کې طالبانو ډله او طالبانو پورې ځینې تړلې ډلې د دې وژنو ډېر مسوولیت پر غاړه لري.
د جرمونو نړیوالې محکمې د دې محکمې نوې کتنې له خوا، یادې محکمې د ۲۰۲۰ زیږدیز کال د مارچ میاشتې په پنځمه دا اجازه ترلاسه کړه چې افغانستان کې له ۲۰۰۱ زیږدیز کال راهیسې د ترسره شویو جنایتونو په اړه څېړنې او ارزونه وکړي.
په دې سره، بې پولې خبریالانو ویلي، چې د ۲۰۰۱ زیږدیز کال را په دېخوا، افغانستان کې خبریالان د خپلو دندو ترسره کولو لپاره درنه بیه پرې کړې ده.
د دې بنسټ مالوماتو له مخې، په تېرو ۲۰ کلونو کې لږ تر لږه افغانستان د ۱۶ بهرنیو هېوادونو وګړو په ګډون ۱۰۰ خبریالان وژل شوي دي. دغه راز په دې موده کې له ۶۰ ډېرې رسنۍ تر برید لاندې راغلي او د خبریالانو او رسنیو پر وړاندې سلګونه ګواښونه ثبت شوي دي.
