اطلاعات روز: ننګرهار ولایت کې یو شمېر خلکو د سولې خبرو پر بیا پیل ټینګار ترڅنګ په دې خبرو اترو کې د ولس د ونډې غوښتنه وکړه.
ننګرهار کې ولسي خلکو نن (دوشنبه، ۱۰ د غبرګولي) د یوې راټولیدنې پرمهال د سولې په ټپه دریدلې خبرو د بیا پیل غوښتنه او ټینګار وکړ.
د افغانستان میدیتوتیک او د افغانستان عامه پوهاوي موسسې د ختیځو ولایتونو ولسي خلک رابللي او د سولې په تړاو یې ورڅخه نظرونه راټولول او غواړي له همدې لارې د خلکو نظرونه د مذاکراتو تر مېز او نړیوالي ټولنې ورسوي.
د یاد پروګرام تنظیموونکی امام الدین همدرد اطلاعات روز ورځپاڼې سره په خبرو کې د سولې خبرو د نه بریالي کیدو یو لامل هم د خلکو نظریاتو ته نه پاملرنه یادوي او وایي، د سولې په خبرو کې یوازې د مشخصو ګوندونو او سیاسي مشرانو نظریات په پام کې نیول کیږي، چې له امله یې اوسمهال د سولې پیل شوې خبرې په ټپه دریدلي دي.
امام الدین همدرد زیاته کړه: «زمونږ هدف دا دی چې د خلکو نظریات راټول کړو او له همدې لارې د خلکو نظریات نړیوالې ټولنې ور ورسوو، ترڅو وکولای شو، له دې لارې د سولې خبرې بریالۍ شي، اوسمهال چې د سولې خبرې دریدلي دي یو لامل یې همدا دی چې د سولې په خبرو کې د ولسي خلکو نظریات نه نیول کیږي.»
د یاد پروګرام یو بل ګډونوال او د ننګرهار پوهنتون استاد محمد داود وفا بیا په خپلو خبرو کې د سولې په ټپه ولاړو خبرو اترو، او ورسره د هېواد په یو شمېر ولایتونو کې د جګړې زیاتیدو ته اندیښنه وښوده.
هغه په هیواد کې د سولې خبرو د بریالي کیدو په برخه کې د سیمې او په ځانګړي ډول د ګاونډیو هیوادونو رول مهم بولي او وایي، نړیواله ټولنه باید د جګړې ښکیلې خواوې د سولې خبرو بیا پیل ته وهڅوي.
استاد محمد داوود وفا زیاتوي: «د سولې خبرو په ټپه دریدل او ورسره د هیواد په زیاتو ولایتونو کې د جګړې شدت هغه څه دي چې له امله یې عام افغانان اندیښمن دي او نړیواله ټوله او سیمې هیوادونو په ځانګړي ډول ګاونډي هیوادونه باید د افغان سولې په برخه کې ریښتنی کار وکړي او هڅه دې وکړي چې د سولې خبرې پایله ورکړي.»
د یادې راټولیدنې یوه ګډونواله میمونه قاضي زاده بیا دا ډول ناستې او راټولیدنې د سولې په برخه کې مهمې ګڼي او وایي، په مذاکراتو کې ولسې ونډې ته پام د سولې خبرو بریا ته د نږدې کېدو په مانا ده.
میمونه قاضي زاده زیاته کړه: «د سولې خبرو کې د عامو افغانانو نظریات اخیستل کیږي دا په خپله د خلکو هیلې زیاتوي چې نور به جګړه پای مومي او سوله به راځي، ځکه د خلکو نظریاتو راټول د سولې په برخه کې مهم دی ځکه د خلکو په نظریاتو سره کولای شو چې د سولې خبرې پایله ورکړي.»
د سولې په تړاو دا ناسته داسې مهال ترسره کیږي، چې ترکیه کې د افغان حکومت او طالب استازو ترمنځ د ناستې پیلېدو په اړه لا هم روښانه پریکړه نه ده شوې.
خو د سولې خبرو په ټپه دریدو او د بهرنیو ځواکونو په وتلو سره سم په ختیځ او یو شمیر نورو ولایتونو کې بیا جګړې زور اخیستی.
